Jowai: Ynne ka sngi ki pulit ka West Jaiñtia Hills da sdang ki ya ka tayaw wow yakhun pyrchah yei pynemkaam bakla ya i drugs kam chibynta yong ka International Day against Drug Abuse and Illicit Trafficking.
Ha kani ka sngi sdang ya kani ka tayaw, da pynman yalang ha ka Conference Hall ka yung krehkaam u Superintendent of Police, West Jaiñtia Hills heiwa da yoh ya ki kyntien pdiang sñiawbha na u Additional SP ka District u Bijay Chettri uwa da khana ya ki kaam wa daw leh ka chnat pulit ha kani ka tayaw kiwa kynthup ya ki yakob dro dur wa kiwi kiwi.
U SP ka District, u Lakador Syiem da pyntip u wa kani ka sngi International Day Against Drug Abuse and Illicit Trafficking kawa da toh u pynman ha ka 26 tarik uni u bnai tangwa da rai wow lehwarom ya kani ka sngi wow yakhun pyrchah ya ki pynemkaam drugs chi tayaw chwa kani ka sngi.
Ka R. Mylliempdah kawa man ka President ka Jaiñtia Traders Association kamjooh leh ka Seiñ Manbei da man ko kam ka kongsan ha kani ka sngi heiwa da pynlait ko ya i Video wa tbian heiyatoh wa i yakhun ya u drugs wa da pynmih da ka yung krehkaam u SP ka District kawa da e pyrtuid “Beyond The Call of Duty | A.N.T.F | Tribute”.
Ka R. Mylliempdah da e khublei ko yaki pulit nadooh ki heh hadooh ki khian kiwa da kreh miet wa sngi wow yakhun ya kani ka kaam wa sih.
Da ong ko wa nachwa da em du i kiad wa u bhang katwa katni won da em ki drugs wei ini da ktah bha i yaka imlang sahlang khamtam ki manbei manpa ki manyung mansem ha kiwa boon ki liang heiwa da khana ko ya ki parom ka Seiñ Manbei hei yakhun ya i dai drugs.
Neiliang u DSP (Hq) u MJ Marngar da e u ya ki kyntien khublei.
Ya i Video ye phi wow pait heini ha wah.
