I kjut Tuberculosis (TB) toh iwa da pteiñ wow chim yei mynisen ki lak ngut ki bru hapoh pyrthai heiwa ka ri India man ko kam kawi na ki ri wa chah ktah bha tangwa hapyrdi ini waroh em ki por mih i yoh mynsien wei yoh kyrmen na ki wym poi pyrkhat kam ka khynnah wa dang 7 snem kawa na Meghalaya kawa pyrtuid Abha S. Nongrum kawa da chim yei rai wow yaleh pyrchah yei kjut TB.
Ka Abha toh kawa puræ Class 2 ha Little Flower School, wei da man ko kam ka Nikshay Mitra namo kawa e yarap kawa dang khian dooh na Meghalaya. Yeini i naam Nikshay Mitra da e cha kitu kiwa e yarap da ka poisa yow kyrchaan ya kiwa yoh kjut TB katkam ka thong krehkaam ka sorkar pyrdi wa tip kam ka National TB Elimination Programme (NTEP).
Ka Abha dei mynsien sbun wei sñiawkhia hanla man ko kawa dang khian rta leh da sdang ko wow pynlang poisa wa yoh ko na ki bei ki pa wa na kiwa emyatoh ko yow thied baam ya kiwa kjut TB wa em ha Meghalaya, neibhah deiwa yoh yei baam wa biang yarap i wow yaleh pyrchah yeini i kjut, wei hawa ye da lai yachem ko leh wa kini kiwa chitom yow e mynsien ya ki najrong wa lai e baam.
Neiliang ka bei ko da ong ko wa ka khon ko ym em johkhe ko wa da ini i khian wa leh ko da man i kyrkhu ya kitu kiwa kjut wa chitom.
Ka Abha man ko leh kam kawa yalehke Taekwondo kawa da yoh Silver Medal hapoh ka jylla wei kam kawa dadep jop leh yei phet Marathon heipor wa dang 5 snem ko.
Ha India kattæ em 253,809 ngut ki Nikshay Mitra kiwa da wan chakhmat wow e yarap cha kiwa yoh kjut TB heiwa ha Meghalaya da em 314 ngut kiwa da chim yei rai wow kyrchaan ya 2,327 ngut kiwa chitom. Kani man ko leh kam chibynta wow pynwiar yei sñiawthooh bakla yeini i kjut yow pynchlur yei ya krehlang kiwa chong chnong yow wanrah yei kylla.
Ka sorkar lyngba ka NTEP da booh thong ko wow pyndooh jait noh yei kjut TB ha uni u snem 2025.
Discussion about this post