Ka JSU seiñ bei da pynsñiaw ko yei sñiawdiaw wei da beiñ joor ko yei man arsap u Montri Rangbah ka jylla u Conrad K Sangma neibhah na i por cha i por da yachem u wa u Montri ki Kaam Pohyung ka ri, u Amit Shah ha Delhi tangwa ym jooh klam næ dawa u na ka sorkar India wow pynkrehkaam noh ya ka ILP hapoh ka jylla wei kani pynyoo che kdar wa u Conrad ym em u yei mon wow pynkrehkaam ya ka ILP hapoh ka jylla wei ym bna u leh yei sur wa i dawa ki paidbah ka Bri u Ynñiawtrep wow pynkrehkaam yaka ILP hapoh ka jylla.
Ka seiñ JSU da ong ko i leh u Conrad toh i wym ye u pdiang neibhah da sah du wow mynjur ya ka Resolution pynkrehkaam ILP hapoh ka Yung Dorbar Chna Aiñ wei kani toh du wow pyndait-thah yei yakhih ki seiñbhalang wa ki paidbah ka Bri u Ynñiawtrep wow dawa yaka ILP ha ki snem kiwa da dep wei katni kani ka sorkar hapoh i yahkhmat u Conrad K Sangma ym em por u wow yaklam ya ka phang ILP wa u Amit Shah tangwa da pynlut por wow lai cha Delhi wow yaklam ya ki kaam yakhle hapoh ka jylla wa ka ri India hi waroh kawi.
Ka seiñ da ong ko wa ym suki hi-eh ya ini i leh mutlop ka sorkar wei daw chong pyrkhat wa kiwi ki seiñbhalang wei daw lum sa ya kiwa synchaar chnong wa Elaka deilang wa u paidbah wow dawa joor yow pynkrehkaam yaka ILP hapoh ka jylla.
