Jowai: Ka Society for Urban and Rural Empowerment (SURE) dei kyrchan ka National Bank for Agriculture and Rural Development (NABARD) da pynman ko yaka yalang ha pyrdi ki Self Help Group kiwa em ha ka thaiñ Amlarem Sub Division. Kani ka yalang da pynman ha ka hall yong ka ophis u Block Development Officer (BDO) ka Amlarem Sub Division heiwa da mihkhmat palat arphaw tylli ki SHG kiwa wan chim bynta ha kani ka yalang.
Ha kani ka yalang da yoh yei klam na u T. Thangkhiew uwa man kam u District Development Manager, ka NABARD, Jaintia Hill, Jowai uwa da batai chaphang ki bynta wa kongsan yong ki SHG kam wow booh sarin ya ki jingkheiñ jingdiah, wow pynman yalang dei langer wei wow booh ya ki rai wa da chim deiwa che. Da batai u leh yaki laad yarap na ki Bank da ki ram kiwa ye ki SHG u chim.
U L.P. Sungoh uwa man uwi na ki Coordinator yong ka Meghalaya Basin Development Agency hei klam yong oo da batai u chaphang ki 10 tylli ki thong kiwa em hapoh ka Integrated Basin Development and Livelihood Promotion Program (IBDLP) yong ka sorkar Meghalaya kawa da tip tbian kam ka Basin.
Hadien ini da yoh yei klam na u bah K.S. Marbaniang uwa man kam u sahep forest uwa da chongngiah uwa kreh leh deiwa ri mrad kawa yoh myntoi bha. U bah Marbaniang hei klam yong oo da kyntu u ya ki SHG wow kreh chitom ki wei da e nongmuna u leh ya ki SHG kiwa tia chaphrang hadooh wow pynlai ya ki bus soo ka MUDA ha Shillong.
Ya ka yalang da pynlai da ka Soni Thubru kawa man kawi ka khyllood kawa kreh neibynta wow kyntu yei rep i riang lyngba ki SHG wa ki Farmers Interest Group (FIG) wei da yoh leh yei klam na u H.H.Mohrmen u President ka SURE.
Discussion about this post