Wow e mynsien ya ki khon khynroo khyllood ka chnong wei wow man ki leh kiwa tip u pynkhreh u saiñdur yei purae puthi wei longbru manbru yong ki, khut pynman ka Dorbar Chnong Loompyrdi Iongpiah ya ka Career Guidance ha ka mat wa ong “Youth: Strength and Opportunities”.
Ya kani ka yalang da pynman ha ka sngi Khyllaw 25 Wisu i janmiet heiwa u R. Lamar daman u kam uwi na ki bru stat bru chemphang wow e baam yei pyrkhat pyrdaiñ ki khynroo khyllood.
Chwa wow yoh i klam i batai na u R. Lamar, da em ka yalang yahkhmat wa tbian hei pynlai u Alan Niangti, Waheh Chnong Loompyrdi Iongpiah wei da yoh leh yei klam na u O.H. Toi kam uwi na ki waheh wasian ka Loompyrdi Iongpiah neitæ hawakut won u Bimi L. Suwer, General Secretary Loompyrdi Iongpiah da e u ki kyntien khublei.
U R. Lamar hawa klam ha kani ka janmiet, da pynchongnia chongyurim yei klam yong oo deiwa kdar u wyrchaw u niawtang ya ki por wa dalai yong i man i long ka chnong Jowai wa ki por wa katni.
Hawa klam kyrpang hajrong ka mat wa ong “Youth: Strength & Opportunities” kyrsu kyntu u ya ki khon khynroo khyllood deiwa ong, kynmoo hawa leh yeiwon yeiwon i kaam emkaam u sñiawthooh chwa yei bor wa ka yurim wa hawa chim i wow lai ha katu ka laiñ, hawa chim i wow leh yeitu i kaam iwa ye næ ym ye u man wei iwa poi næ ympoi cha ka thong, itæ toh emkaam u sñiawthooh phi yei bor.
Neitæ hawa kdar won ya ka “Opportunities” næ ka laad ka kabu, ong u heini leh toh u man ki khynroo khyllood kiwa chynna jngai næ kiwa tip u chim ya katæ ka kabu ksiar heipor iwa biang hei rta iwa biang neibhah ladym tip phi u chim rai kat dang biang i por ya phi, ya samboi u yap sepai katæ ka kabu ksiar ya phi.
Chooh chooh u R. Lamar hapyrdi i hiardor i kylla yong ka puræ puthi ha kani ka juk wa i por wa katni neidaw wa wym em de i sikai ya ki khynnah chaphang ka Personal Character, ban joor u leh ya ki khon khynroo khyllood wow man kiwa tip ya ka akor ka burom neibhah kani yarap ko chiboon chah hei wow ye phi u pteiñ chakhmat yei longbru manbru yong phi.
