Jowai: Ka Namdong Christian Club Namdong-A hei yakrehlang wa ka yung krehkaam ka District Social Welfare Officer, Jowai da pynman ki ya ka Awareness Programme kawa chi sngi hajrong i ktah na i pynemkaam wow dih ya ki mar wa pynmuaid kam i drugs wa i kiad ha ka 08 tarik ha chnong Namdong-A.
Ha kani ka sngi da wan yachim bynta da kiwa chong chnong ka Namdong-A nadooh ki manbei manpa, ki khynnah khynroo khyllood wa kiwi kiwi.
Ya kani ka yalang da pyllai da u E. Susngi, wei chwa wow sdang ya kani ka esikai da yoh ya ki kyntien pdiang sñiawbha na u D. Lyngdoh uwa man kam u Secretary ka Club, hadien ini won da yoh yei klam hajrong kani ka phang na ka Dr. J. Laloo na Namdong PHC kawa da e nongmuna kammon kini ki mar dih ktah ki yei manbru longbru hei yatoh wa i chait i khiah ka yung ka sem, ka imlang sahlang wa kiwi kiwi.
Hadien ini da yoh won i klam na u P. Shyrmang uwa da batai hei yatoh wa ki laad yarap wa yoh na ka yung krehkaam ka District Social Welfare khamtam kiwa em i duna ha i doh i pran, ki laad yarap ya ki seiñ wow pynman ya ki yalang pynsñiawthooh paidbah waphær waphær. Da yoh leh i batai hei yatoh wa i chah ktah i mar pynmuaid na ka J. Synnah, District Social Welfare Officer Jowai, kawa da batai yei ktah kini ki kaam ya i chait i khiah, wa kiwi ki liang.
Chooh chooh da e leh i batai wa kammon ka yung ka sem jæd pra ko deiwa pynemkaam ya kini ki mar dih pynmuaid neibhah wa boonsien hi kini yah ki cha i awri awra ha yung ha sem, wei pynthut i leh ya ki khon ki kti.
Chwa wow poi chawa kut da yoh ya ki kyntien e khublei na u L. Lyngdoh.
Discussion about this post