Kam chibynta yong ka Children’s Day 2022, ki pulit ka 6th Battalion Meghalaya Police, Umran, ka Police Training School wa ka Meghalaya Police Academy, Umran ha ka 12 tarik da pynman ki ya ka lehkmen wa kyrpang heiwa da wan chimbynta da ki 200 ngut ki khynnah.
Kani ka lehkmen toh chibynta yong ka Meghalaya State Legal Services Authority waka Faith Foundation, Shillong hajrong ka phang “Back To School-Safety & Security”.
Ki pulit ka 6th BN MLP wa PTS/MPA, Umran da kynmoo ki yei por wa lai skur ki deiwa sap ya ki sula skur warim yong ki wei da yaklam ki leh wa ki khynnah.
Ka thong yong ka lehkmen toh wow pynchlur ya ki khynnah wow pyndep ki yei puræ wei wow man kiwa chait wa khlan.
Kani ka lehkmen da sdang ko heipor 9:00 waje i step heiwa ki khynnah da poi ki ha 6th BN MLP, Umran Campus wei da yaklam ki wa ki pulit heiwa da pynyoo rong ya ki tiar tymplæh diñ, ki tiar wow e wow wyrta wa kiwi de.
Da pynsñiawthooh leh ya ki kaam wa man pyrchah ya ki kynthai wa ki khynnah wa i chait i khiah da ka Meghalaya State Legal Services Authority waka Faith Foundation, Shillong.
Ha kani ka sngi da pynman leh ya ki yakob neibynta ki khynnah wa i pynwyrngia da ki chaad na ka Meghalaya Police Cultural Troupe wa na ki khynnah.
