Ki bor pait bor pynlai ka seiñ ki khynnah skur yong ka ri India wa tip kam ka Akhil Bharatiya Vidyarthi Parishad (ABVP) ha ka thong wow wanrah i yajooh yajan hapyrdi ki dkhot yong ka seiñ wa em hapoh ka jylla, nadooh ka 13 tarik hadooh ka 15 tarik uni u bnai da pynman ko ya ka 6th State Conference ha Yungwalieh ka Dorbar Chnong Chilliangraij, Jowai.
Ha ka yalang yahkhmat yong kani ka 6th State Conference wa man ha ka 14 tarik da wan emlang da ka Padmashree Awardee ka Trinity Saioo kam ka kongsan, u Hamarsing L. Kharhmar kam u symbood kongsan, u Ashish Chauhan, National Organising Secretary-ABVP, u Dr. Sashankutlang Khongthohrem, State President ABVP, u Tengku M. Marak, State Secretary ABVP, u S.K. Lato, Chairman Reception Committee, u Skemjingmut Law, Secretary Reception Committee najrong kiwi ki waheh wasian.
Ya ka yalang yong kani ka sngi da pynlai da ka Sumarlin Mawlong, State Social Media Convener heiwa u S.K. Lato da e u ki kyntien pdiang burom wa ki kyntien yahkhmat neitæ u Dr. Sashankutlang da pynsñiaw u yei parom wa tbian ka ABVP Meghalaya katwa u Skemjingmut Law da pachat u ki kyntien khublei.
Ka Trinity Saioo kam ka kongsan da kitbok kitrwiang wei e ko leh ki kyntien sneiñ kyntien kroo wa ki kyntien e mynsien ya ki dkhot ka ABVP katwa u Hamarsing L. Kharhmar hawa klam e mynsien ya ki dkhot ka ABVP da pynchongnia chong yurim u yei klam i kappæ yong oo ha ki le tylli ki kyntien choh yumut ka seiñ iwa ong “Knowledge-Character-Unity”.
Chooh chooh ha kani ka yalang da yoh leh i klam wei pynsñiaw ya ki yurim krehkaam yong ka ABVP na u Ashish Chauhan.
Ha ki le sngi yong kani ka 6th State Conference da kynchiap ki yalang waphær wa kynthup ya ka lai paidbah kam wow e wyrta chula hapoh ka chnong Jowai chaphang ka seiñ ABVP neitæ i pynman ya ka Cultural Program wa kiwi kiwi ki rukom wow khriñ yei pyrkhat pyrdaiñ ki dkhot ka ABVP kiwa da wan na ki District waphær yong ka jylla.
