Ynnin ka sngi ka seiñ Akhil Bharatiya Vidyarthi Parishad (ABVP) Jowai da pynman ko ya ka yalang wa kyrpang ya kawa da tip kam ka Counselling and Interactive Session neibynta ki khynnah Class 10 wa Class 12 yong ka North Liberty Higher Secondary School, Jowai.
Ha kani ka sngi da emlang u Principal ka skur, u Richard Uriah wa kiwa sikai yong ka wei da pynman ya kani ka esikai deiwa bood ya ki kyndon wa da booh da ka sorkar.
Neidaw wa em kani ka khlam COVID-19, i puræ puthi da man i iwa da chah ktah joor bha wei da haap wow pynman ya ki esikai du lyngba ka Online Class donhi wei i thut ka network sam ktah chooh i ya ki khynnah.
Kamtæ neiliang ka seiñ da khut ko ya u Prof. Kripamoy Aguan Head Department of Biotechnology and Bioinformatics, NEHU Shillong, wow wan e mynsien ya ki khynnah kam ha ini i por chwa wow pynkhreh ki ya ki exam yong ki.
U Prof. Aguan da pyndep u ya ka PhD na Birmingham UK hajrong ka phang Jenatic in Plant Breeding. Ha u 1990 da pyndep u ya ka Post Doctorate na University of London, ha u 1993 da pyndep u sa kawi ka Post Doctorate na University of Augusta Georgia, USA, ha u snem 1997 da man u kam u Assistant Professor ha ka University of Maryland.
Neiliang yong oo da kyntu u ya ki khynnah wow booh chwa ki ya ka thong haphrang dooh khnang wow tip ki kammon u leh wow pynkhreh ya ka luti wow poi heitæ.
Da kyntuh leh ya ki wa emkaam wow kiar ki na ki Social Network kiwa boonjait.
Kiwi kiwa da klam da batai ki ya ki khynnah ya ki laad ki luti heiyatoh wa i puræ puthi wei wow lehbha ki ya ki exam yong ki khlem i teiñsar.
