Ka West Jaiñtia Hills District Adventure Sports & Mountaineering Club kam chibynta wow pynku ya ki kaam uiñke suwari hapoh ka District da pynman ko ya ka e sikai wa tip kam ka Basic Adventure Course kawa 2 sngi hapoh ka chnong Umladkhur (Sua Ludong), kawa haap hapoh Amlarem Sub-Division.
Ya kani ka e sikai da leh yow pynmih ya ki bru napoh ka Distrct ki wow man kam ki Local Guide wa kamjooh na kiwi ki District. Ha kani ka chah sikai wa ar sngi da em kamwa 20 ngut kiwa chimbynta deiwa em 7 ngut na East Khasi Hills wa 13 ngut na West Jaiñtia Hills kiwa da chah sikai kammon wow hiar riat wei wow ku riat.
Da pynleh leh ya ka Rappelling ha kchaaid Phe Phe neibynta waroh kiwa wan chah sikai deiwa emlang leh u President yong ka Club uwa man leh kam uwa sikai (Instructor) wa 4 ngut ki Assistant Instructor yong ka Club.
Ka Club e khublei kyrpang ko ya kitu kiwa da chimbynta ha kani ka e hikai wei kamjooh leh ya ka YESS Meghalaya Scheme, Jet 24×7, The Computer Store, KD Dhara Palace, DROBED Shillong, MJ Cleaning wei khamtam ya u Donbok Buam uwa da chah wow pynemkaam ya ka thaw ha Sua Ludong kam ka thaw wow e sikai namo ka Training Area.
Hawa kut kani ka e sikai da e khusnaam cha ki arngut kiwa da da yoh yei naam Best Trainee, ka Shimti Siangshai waka Yana Nyza Marwein wei neiliang ka Club e khublei kyrpang ko ya kini ki ar ngut wow nang ku ki chaphrang ha kiwi kiwi ki liang.
Ha kani ka e sikai da emlang u Sambor Surong uwa man kam uwa seiñ ya ka Club, u Diket Buam, u Lashman Buam, u Defender Buam waka Binia Shylla kam ki Assistant Instructor.
![](https://i0.wp.com/wyrta.com/wp-content/uploads/2023/07/sydhjd1.jpg?resize=960%2C720&ssl=1)
Discussion about this post