Pynman ka Akashvani North Eastern Service Shillong da ka tamasa yow pynyatylli yaka imlang shlang

Ka Akashvani North Eastern Service Shillong da pynman ko ya ka G20 Concert for Communal Harmony neibynta wow wanrah yei yatylli wei wow im dei suk dei saaiñ haka imlang sahlang lyngba i bor i sur i rwai yow pynyajan hapyrdi kiwa chong chnong.

Ya kani ka tamasa da wai da ki kyntien pdiang sñiawbha na u Hamarlin Diengdoh, Head of Office, Akashvani North Eastern Service & Akashvani Shillong. 

Ya kani ka Concert da pynman hei janmiet ka 6 tarik uni u bnai ha U Soso Tham Auditorium, Shillong yow pynoo leh ya kiwa boon ki jaitbru wa em wa sah wa im ha Shillong kiwa da em ya jar jiar ka riti dustur.

Kani ka G20 Concert da pynman hajrong ka phang wa ong ‘Vasudhaiva Kutumbakam- One Earth One World One Future’ heiwa da wan wow chimbynta da kiwa rwai wa tem na kylleiñ ki jylla ka thaaiñ North East. 

Related posts

Da ka S-Presso, ka Hero X Pulse, i ksiar wa ka Latop u pynkhle ka Iapmala Presbyterian U.P. School

November 22, 2024

Da rah tarik ya ka sngi pynkhle ya ka Lucky Draw ka Ñiaw Wasa United Sports & Cultural Club

November 22, 2024

Kani ka janmiet da man ko kawa jop heiwa da ya wanlang kiwa boon wow lehkmen ya ki waphær waphær ki riti dustur wei yei emkaam wow wanrah yei ya imlang deiwa em i suk i saaiñ.

Ki rwai wa da rwai toh kiwa klam chaphang i kylla wei ku i chit ka pyrthai wa ki rukom u warim wa jah wow yada wei wow pynneh pynsah ya ka rym-aw iwa da rwai leh da ki khynnah skur ka Shillong kiwa na Arunachal Pradesh, Assam, Nagaland, Sikkim wa Tripura.

Da em leh ka dhab tem ki chipai wa tip kam ka ‘The Rhino Boys’ wa yahkhmat da u Priyo Kumar Singh wei da em leh ka ‘2dB’ kiwa na Shillong wa yahkhmat da u Felix Langstieh kiwa da pynchongchit ya ki paidbah.

Da wan leh wow chibynta da ki khynroo khyllood kiwa pynyoo yei sap rwai, sap tem wow pynyoo yei mahajon ka India kawa em ki jaitbru wa boon jait. Ha kani ka Concert ka phang wa pyrdi toh yow pynyoo yei bor i sur wow wanrah yei ya sñiawthooh uwi ya uwi yow ye leh ki juk wow wan wow im dei suk dei saaiñ. 

Ha kani ka sngi da wan leh wow embyntalang wa ki heh ka Assam Regimental Centre Shillong waka RML Marbaniang, Head of Program Akashvani Shillong

Ka Lianpuia Paite, Head of Programme, DDK, Shillong wa u Ferdinand A Dkhar, Head of Programme, Akashvani North Eastern Service da e ki yei klam. 

Ya kani ka janmiet da pynkut deiwa ya rwai lang yei sur ‘We are the World’. Ki paidbah ym em hun ki wow pynkut noh ya kani ka janmiet deiwa dawa wow tem biang ka 2db kiwa da mih biang yow pynhun ya ki paidbah.