Ynne ka sngi da man ko ka wow sahkynmoo ya ki khynnah skur yong ka chnong Shangpung waroh kawi heiwa kawi na ka seiñ wa da seiñ da kiwa sikai yong ka chnong Shangpung, wa pyrtuid ka All Shangpung School Organization (ASSO), da ye ko wow pynman ya kawa nyngkong dooh ka Inter School Football Tournament neibynta ki skur wa em ha Shangpung.
Kani ka lympung yalehbol toh neibynta ki chynrang wa kynthai heiwa ya ki chynrang toh ya kiwa em hapoh 14 snem wa 18 snem i rta katwa ya ki kynthai won da pynman neibynta kiwa em hapoh 18 snem i rta.
Da wan wow chimbynta ha kani ka ka Tournament da 23 tylli ki liang wa kynthup ya waroh ki kynthai wa chynrang.
Ya ka yalehke wa nyngkong da sdang da ki yong ki chynrang wa em hapoh 18 snem i rta kitæ hapyrdi ka Shangpung Presbyterian Higher Secondary School waka Khad-Ar Nor Secondary School, heiwa ka Shangpung Presbyterian da jop ko da 2-1.
Ya kani ka Tournament da wan wai pyrda da u BDO ka Laskein C&RD Block, u B. Niang kam u kongsan, heiwa u President ka Synjuk ki Dorbar Chnong ka Shangpung, u N. Papang da man u kam u symbood kongsan deiwa ya emlang ki waheh chnong ka Shangpung Pyllun deilang wa ki bru wa paaw khmat yong ka chnong waroh kawi wa kynthup ya kiwa sikai skur nadooh ki ki Head Teacher wa ki khynnah skur waphær waphær.
Ya ka ASSO da yahkhmat da u W.S. Passah kam u President wa u F. Langbang kam u Secretary wei ki Head Teacher yong ki skur waphær waphær da man ki kam ki dkhot.
I thmu kani ka seiñ toh wow wanrah yei yatylli ki skur wa em ha Shangpung ryngkat wow pynman ya ki yakob waphær waphær.
