Haka 27 tarik u bnai wa dep, ka Cadenza School of Music Shangpung da pynman ko da ka ‘The 2nd Thrills of Hope (Gospel Concert)’ ha Community Hall Shangpung Koira heipor 6:00 waje i janmiet.
Hachwa u sdang da em ka yalang heiwa da pynbna ya ki sarin i lai kani ka janmiet da u Secretary, u Tedeum Laudamus Lapasam wei da pynlai yaka yalang da u Chairman, u Macmillan David Suchiang, deiwa emlang u Tymmen Wasan, u Wamehi Law uwa man leh kam u kongsan chirup wa u Waheh Chnong ka Shangpung Mission, u Newoneborn Suchiang, u Waheh Chnong ka Shangpung Koira, u Kitboklang Wann neitæ u Heimonmi Iakai, Principal ka Shangpung Presbyterian Higher Secondary School, u Tymmen Wasan, u Kermiki Iakai wa kiwi de kiwa chah khut sñiawbha.
Da yoh yei rwai pdiang na u Tandon Nongtdu wa i ktien tbian na u Principal yong ka Music School, u Kenneth Anderson Iakai uwa da khana yei thmu wow pynman ya kani ka Gospel Concert ryngkat i ya krehlang waka Meghalaya Grassroots Music Project neibynta wow pynku yaki khynnah, ki khynroo khyllood kiwa em yei sap i phong wow rwai u tem kiwa wan puræ ha kani ka Music School, wei lyngba kani ka Concert ki khynnah daw yoh ki leh u maad yei mih rynsan kamjooh leh yow chlur ki.
Da khana u leh wa kiwa lai puræ kani ka Music School da chah khut ki wow lai chadooh ki yalang District wa hapoh ka jylla wow chimbynta kam haka Republic Day wa Independence Day. Kamtæ khnang wa ki khynnah u nang man ki kiwa ryntih, neiliang ka Committee yong ka School Committee da rai ko wa nadooh uni u snem ki khynnah waroh daw hap ki wow sap da ki Uniform yong ka Music School.
Da yoh leh yei klam tbian na u Waheh Chnong ka Shangpung Koira uwa da pyn-eh-daw yaki khynnah hei lai puræ ki heiyatoh waka tem ka put wei hadien da yoh yei klam na u kongsan uwa da sñiawkmen hadooh kattæ kattæ wa ka Committee yong ka skur khut ko ya oo wow embynta u wei oo leh man u uwa ka’it bha yei rwai i tem neibhah nachwa man u leh kam uwa rwai.
Kamtæ da kyntu u yaki khynnah wow leh chitom ki u kohngooh ya kiwa sikai kamjooh ki bei ki pa yong ki yow yoh ki u khait yow soh wa thiang. Heijooh i por da ong u wa ymtoh u man kiwa sarong neibhah manda man kiwa sarong ympoi cheiwon cheiwon.
Ya ki kyntien e khublei da yoh na u Issak Winner Suchiang wei da pynwai yaka yalang dei duwai na u Tymmen Wasan Kermiki Iakai .
Yaka bynta wa bood da pynlai da u Dr. Reconcile Langstang wei da chimbynta wow rwai u tem ha kani ka Concert da ki khynnah kani ka Music School, neitæ ka Balang Tnat Khliehrangnah, Junior C.E. Society Shangpung, Senior C.E. Society Shangpung deilang waka Arch Angel Band.
Da pynwai ya kani ka Concert da i duwai kyrkhu na u Apkiwanlang Suchiang.
Discussion about this post