Ka Central Bureau of Communication (CBC), Ministry of Information and Broadcasting, Government of India, Regional Office, Shillong da pynman ko ya ka Photo Exhibition yow lehkmen yei dap 75 snem ka ri wa da e pyrtuid Azadi Ka Amrit Mahotsava ha NIT Meghalaya, Shillong kawa sdang nadooh ka 6 tarik wei daw pynkut ha ka 9 tarik uni u bnai.
Kani ka pynyoo rong ya ki dur toh yow khana parom yei yaleh laitlooid hapoh ka ri lyngba ki dur ki dar.
Neiliang u Director i/c, NIT Meghalaya, Prof. Ayon Bhattacharjee hawa wan wow wai ya kani ka Photo Exhibition ha ka 6 tarik da yaroh u ya ka CBC Shillong wa da pynman ko ya kani ka Multimedia Exhibition deiwa kyntu leh ya ki khynnah skur wow wa sakhi ya ini waroh.
Da ong u leh wa kini ki dur da yarap ko ya i wow lai biang chadien cha ki por wa yaleh laitlooid ya ka ri kamjooh yow kynmoo warom ya kitu kiwa da dooh noh yei mynsien ki heijooh i por wow khana yei parom kitu kiwa yakhmat yow pynman yei yakhih.
Da yaroh u leh ya ki khlawait ka Meghalaya- U Tirot Singh, U Kiang Nangbah wa u Pa Togan Sangma. U Prof Atanu Banerjee uwa man leh kam u Dean i/c Students Welfare & Academics, NIT Meghalaya, Shillong da ong u wa kini ki dur da khana ki leh chaphang kitu ki khlawait ki wym em yoh yei tipmit yei bynta wa da leh ki.
Ka Dr. Moushumi Dey, Faculty Member, History Dept Women’s College, Shillong da klam bniah ko hajrong ka phang “Ladies Freedom Fighters: Unsung Heroes of Meghalaya”. Da khana ko chaphang ki kynthai kiwa da yaleh wow yoh ye laitlooid kiwa na ka thaaiñ Northeast kam ka Phan Nonglait na Meghalaya, ka Manorama Banerjee na Tripura, ka Rani Gaidinliu na Manipur, ka Helen Lepcha na Sikkim waka Kanaklata Baruah na Assam.
Da ong ko wa i bynta ki kynthai hei yaleh laitlooid ya rynkat ko wa i bynta ki chynrang neibhah ki da ya yieñ lang ki na tympha ha tympha wei da toh i por wow tipmit ya kini ki chlur mynsien wow yakhih yow yoh yei laitlooid na ki pharæng.
Chooh chooh da ong ko wa emkaam wow sikai ya ki khynnah yow tip ki chaphang kini ki bru wa khroo yow wanrah leh yei sñiawsarong ya ki bru yong ki heijooh i por yow pynchlur ya ki wow yieñ yaleh lada em kiwa wan thombor.
Da kdaw ko leh yei duna iwa thoh ha ki kot ki sla skur namo ki kot History ki khynnah skur khamtam chaphang ki khlawait kani ka thaaiñ mihsngi wei ini toh u kylla noh deiwa chimbynta lang ki paidbah yow khana yei parom yong kini cha waroh kawi ka ri.
U Sudipta Kar, Field Publicity Officer da khana u yei rukom krehkaam ka CBC ha kani ka thaaiñ wei kani ka Exhibition toh yow pynsñiawthooh ya ki paidbah chaphang ka Amrit Mahotsav wei kammon ki paidbah ye ki wow ya embyntalang. Da khana u leh ya kiwi de ki kaam wa da leh ki yow pynsñiawthooh paidbha chaphang kiwa boon ki jait kaam.
Ha kani ka Exhibition da pynman leh ya ka yakob Quiz, i yakob klam paidbah wa i yakob dro dur.
