Ka yung krehkaam u District Horticulture Officer, WJH Jowai ynne ka sngi da pynman ko ya ka Horticulture Exhibition 2021-22 wa chisngi hapoh ka MIDH Scheme wow pynyoo rong ya ki soh ki pe ha Chutwakhu Indoor Sport Hall kiwa da pynmih da ki warep yong ka District, wei heijooh i por leh u pynsñiawthooh chooh chooh ya ki paaid warep hajrong kammon wow nang ye u pynku chooh chooh yei rep i riang.
U D. Lyngdoh, Horticulture Development Office, WJH hawa pynsñiaw yei yumut kani ka Exhibition, da ong u wa kani ka sngi pynyoo ko leh yei jop yong ki warep yei kaam wa da leh ki wow rep jhoor, thung syntu, psan mrad wa kiwi ki bynta wa yatoh wa i rep.
Da ong haroh u wa kini ki mar rep wa pynmih da i hi man ki kam ka spah, kamtæ emkaam u pynneh pynsah dei wow sumaar khamtam ha kini ki sngi wa kylla i suiñbneiñ.
Neiliang u kongsan yong kani ka sngi u Andrew Shullai, MDC hawa klam da ong u wa kam ki warep toh u sñiaw sarong ki yei kaam neibhah wa man ki kiwa pyndap baam haka imlang sahlang wei kamjooh kiwa pynyoh yeiwa emkaam i doh i pran kam ki Vitamin waphær waphær lyngba ki jhoor, ki soh neibynta u yoh yei doh i pran wa chait wa khiah.
Heijooh i por kyntu u ya ki warep wow lehbha ki hei kaam najrong wow kylli bniah leh naka chnat krehkaam khang yow pynpliah chooh chooh.
Kiwi won wa da e yei klam pynsñiawthooh hajrong kammon u leh yow ye u pynku chooh chooh yei rep i riang kynthup ya u Dr. D. Paswet, Senior Scientist KVK Jaiñtia Hills, u Dr. D.I. Kjam District AH & Veterinary Officer WJH wa u D. Pyrbot, District Agriculture Officer.
Ya ka yalang ha kani ka sngi da pynlai da u Mebanphikir Kharbuli, Farm Manaher KVK, da yoh ki kyntien pdiang naka R.K. Blah District Horticulture Officer WJH Jowai, katwa yei kyntien e khublei da yoh na u R.D.I Phyllei Asst. Director of Horticulture MKT.
