Ka District Labour Office, West Jaiñtia Hills, Jowai deiwa ya krehlang wa ki Community Service Centre (CSC) da pynman ki yei pynpsiah pyrtuid ya kiwa kreh mylla sngi (Unorganized Workers) hapoh ka Website ka e-Shram ynnin ka 29 tarik ha Ladthadlaboh Community Hall nadooh 11 waje i step.
Chwa wow sdang i pynpsiah pyrtuid, da yoh i klam na ka Labour Inspector, ka B. Toi kawa da batai bniah chaphang ka e-SHRAM.
Neiliang u K.L. Pariat, President yong ka All Jaintia Muster Roll Workers & Labour Union da kyntu u ya ki paidbah wa ym toh u sñiawthooh bakla wa kani toh ka Scheme Insurance tangwa toh ka dwar kawa wailaad ya ki bru wow yoh boon ki myntoi naka sorkar India.
Neiliang u M. Myrchiang, District Manager ki CSC da batai u wa i pynpsiah pyrtuid toh lyngba kiwa boon ki CSC kiwa em ha kylleiñ ka District. Ka e-SHRAM toh kawa da pynmih da ka chnat Labour & Employment, yong ka sorkar India ha ka 26-08-21 wow pynpsiah pyrtuid ya waroh kiwa mylla yong ka ri, kawa kynthup ya ki wakreh ASHA, Anganwadi, MGNREGA, ki wakreh mistri, kiwa chong kreh ha ki yung bru, ki warep, kiwa kreh yei kaam yong ki hi, kiwa chong dai madan, kiwa chongdai dukan, kiwa khwe, kiwa ri mrad wa kiwi won ki wym biang ka kamai kajih.
Kini ha wah toh ki kyndon næ iwa emkaam ya kiwa pynpsiah pyrtuid ha ka e-Shram Portal:
- Toh u man ki kiwa em 16-59 snem i rta.
- Toh u em Aadhaar Card.
- Toh u em u Mobile Number wa da dep wow pynyabi wa u Aadhaar.
- Toh u em ka Bank Account wa krehkaam.
- Ym toh u man ki dkhot yong ka EPFO, ESIC lane NPS.
Kam wow kdaw heini wa ya i Registration namo i thap pyrtuid toh i wym emkaam u su katni, wei i myntoi toh wow yoh yarap kawa poi T. 2 lak lada yap mynsoo ha i ya tyrrah kari wei lada man noh kam kiwa tkoh pura wei daw yarap T. 1 lakh lada mynsoo wei tkoh malu mala.
Neini chakhmat leh, kiwi kiwi ki laad yarap neiliang ka sorkar daw lai bait lyngba kane ka Website namo ka Portal.
