Ka yung krehkaam ka Chankylliang Development Society (CKDS) hapoh ka Link Worker Scheme (LWS) deiwa kyrchaan ka Meghalaya AIDS Control Society (MACS) da yoh ko wow pynman ya ka Village Level Awareness Camp (VLAC) waka HIV/STI Screening ha chnong Dkhiah East, EJH neibynta ki jait kjut wa yoh nei ya thiah ya dem kulmar. Ha kani ka yalang kawa man leh kam chibynta wow pynsñiawthooh paidbah, da pynlai da u wakreh ka CKDS, u Usefull Amrynsong uwa pait ya ka chnong Dkhiah East wei da yoh yei klam pdiang sñiawbha na u Waheh Dong ka chnong Dkhiah East.
Ha kani ka yalang, da em leh ka ICTC Counsellor ka Khliehriat PHC, ka Philia Paslein kawa da pynsñiawthooh paidbah kammon wow pynduna yei poor smat uni u khñiang HIV/AIDS.
Neiliang u Ajoy uwa man kam u Programme Officer (PO) ka Meghalaya AIDS Control Society (MACS) da ong u wa kitu kiwa da em kjut, emkaam u dih dawai tista ki uwa tip kam u Anti-Retroviral Therapy (ART) khnang yow pynduna yei pynkha uni u khñiang hapoh i doh i pran u bru. Da klam u leh yei chah yoobeiñ lane i chah pait poh ya kitu ki bru kiwa em ya uni u khñiang deiwa pyntip wa kiwa leh yeini daw chah pynngat hapoh ka aiñ wei ye leh u chah kem.
Ka Philia Paslein da batai ko wa kammon uni u khñiang HIV/AIDS ktah u yei doh i pran ki bru wa kiyi ki laad yada khnang wow ye u kiar nei yabi kamjooh leh wow pynduna yei poor smat uni u khñiang.
Da ong ko leh wa em i maa lada ki bru yong ka chnong ym chimkhia ki wow sumaar wei wow leh ya ka Test wei wow dih dawai ha i por wa biang, wei ini ye i wow wanrah yei maa hadooh chei yap leh. Kamtæ da pynchlur ko leh ya ki khynnah khynroo, ki manbei wa ki waheh wow wan ki chakhmat wow leh ya ka Test khnang wow tip yei man yong idæ wei ka Test ym hap wow su kawa da e mynkna da ka sorkar.
Ha kani ka sngi da pynman leh ya ka HIV/STI Screening deiwa Test khnang yow chem lada u/ka bru em ki ya uni u khñiang kjut heiwa kamwa 120 ngut da wan ki chakhmat wow chah Test.
