Ka Chief Minister Youth Center (CMYC) Pasyih da pynman ko yaka Exhibition wa nyngkong yong ka ha ka 16 tarik uni u bnai ha chnong Pasyih. Kani ka thaw yarap e sikai man ko kawi na kiwa em hapoh Jaiñtia Hills najrong kawa em ha Shangpung, wei da khut ya ki kam ki Self Learning Center namo ki thaw wow sdang u tip pyn da i hi heiyatoh kammon u sdang ya iwon iwon i kaam wa kwah ki u tip næ u leh hawa im ki.
Kani ka CMYC em ko leh ya ki chnat krehkaam kam ka thaw puræ kot (Library), ka yalehke panang pliang kawa tip kam ka Frisbee Game wa ka sikai yaleh Chess.
Ha kani ka sngi da emlang wa u MLA ka Jowai, u Wailadmiki Shylla kam u kongsan, u Skill Development Officer ka West Jaiñtia Hills District, u Lambormi Suchen da man u kam u symbood kongsan deiwa emlang u waheh chnong ka Pasyih, u Lakhon Dkhar, u Jitendra Dkhar, Founder yong ka Blind Lead Trust Organisation wa kiwi kiwi de kiwa chah khut sñiawbha kam ki waheh dong, ki VO, ki VDP, ki Headmaster, ki Headmistress yong ki skur wa em hapoh ka chnong Pasyih.
U Wailadmiki Shylla hawa e yei klam da ong u wym poi pyrkhat u wa ka chnong Pasyih u em ko ya kam kani ka thaw e sikai neibhah kam kani ka Center boonsien jooh em ki cha ki thaw wa man sor ymtoh cha palatsor. Da ong u leh wa na kiwa boon hi ki chnong, ka chnong Pasyih da man ko kawa embhah hadooh kattæ kattæ neibhah wa lyngba kani ka Center kiwa chong chnong yoh laad ki u pynyoo ya ki sap ki phong kiwa em ha ki.
Da kyntu u leh ya waroh kiwa chong chnong wow wan mih ki chakhmat wow chim ya kani ka kabu ksiar neibynta i myntoi kiwa em hapoh kani ka Center.
U Lambormi Suchen won hei klam yong oo da ong u wa kiwa chong chnong Pasyih man ki kiwa embhah, neibhah hapoh kani ka Center da pdiang bait ya waroh nadooh ki khynnah hadooh ki waheh, wei ym em u booh yei rta wa i kyrdan puræ puthi ymtoh kam ha kiwi ki thaw e sikai wa kam kini.
U Phaibiang Shylla, waheh chnong warim chnong ka Pasyih da ong u wa heipor wa chwa u sdang ya kani ka Center, man ko ka yaleh kawa rap chitom heiyatoh wa i yaklam neibhah wym du ka Pasyih wa yaleh yow yoh ya kani ka Center heiwa da em leh boon kiwi ki chnong, tangwa neiliang ka CMYC Meghalaya da yoi biang ko wow booh kawi hapoh chnong Pasyih. Da pynbood chooh chooh u deiwa ong wa kmen bha u wa toh heipor wa man u kam u waheh chnong da ye u pynyoh ya kani ka Center neibynta i myntoi kiwa chong chnong waroh kawi.
U Ram Dkhar uwa klam salan neibynta yong u waheh chnong, da ong u wym ye de u pynyoo hadooh katwon itæ i sñiawkmen wa da yoh kam kani ka thaw e sikai neibynta i myntoi wa i bha yong kiwa chong chnong hi waroh kawi. Da kyntu u ya waroh wow pynlait yei por yong ki wow wan cha kani ka Center ha ki sngi ki por kiwa daw wan.
Ya kani ka yalang da pynlai da u CMYC Innovation Manager, u Embhahlang dkhar wei da yoh ya ki kyntien pdiang burom na ka Angelina Dkhar kawa man kam kawi na kiwa chah sikai wei heijooh i por kawa pait yaka Library.
Hachwa wow wai ya kani ka Exhibition da em ki rwai, ki chaad tynre, i yalehke drama wa kiwi kiwi.
Hawa wai pyrda ya kani ka Exhibition da em leh i ah ya u Cake da u kongsan uwa da chet da ki khynnah wa chah sikai hei chet baam.
Hadien ini da pyndood yei pynyoo ya ki tiar ki tar wa da chna da kiwa chah sikai nadooh ki that ki nep, ki sabon, ki sur rwai, i pynyphooh yei dur khmat (Beautician), ki marbaam, ki tiar wa chna da ki mistri wa kiwa chna phlim.
Da pynkut ya kani ka sngi da ki kyntien khublei na ka CMYC Community Manager, ka Sharon Langbang.
Discussion about this post