Ka Don Bosco Youth Centre da pynman ko ya ka Career Expo 2022 neibynta kitu kiwa dang pyndep ya ka Class X wa Class XII Exam ha Cilia Memorial Hall ynnin ka sngi. Wei i thmu toh wow yahluti wei wow e mynsien ya ki khynnah yow ye ki u jied ya ka laiñ puræ wa yatoh wa ki yow pynkhreh ya ka mynried yong ki.
Ha kani ka sngi ki bru chemphang wa da wan toh u Tosanbha Marwein MCS, Executive Magistrate wa Extra Assistant Commissioner, u Br. William, uwa sikai ha St. Edmunds, ka Susana Khongwir, kawa man kam ka Life Coach, Trainer wa Counsellor wa u Fr. Michael Makri, Director ka DBYC.
Ha kani ka sngi ki khynnah kynthai wa chynrang kiwa da wan wow embyntalang da em ki kamwa 200 ngut.
Ya kani ka Career Expo da sdang heipor 10:00 waje i step da ki ktien wai phang na u Director, iwa da pynbood da i klam na u Tosanbha uwa da kyntu ya ki khynnah wow im deiwa em ka thong. “Ym toh u e laad wow chah rem neibhah lada ong phi wa da rem da man kamwa da dooh noh yei thong yei angnood.”
Neiliang u Brother William da e u yei yahluti wa kynja mynsien deiwa ong wa iwon iwon wa leh i toh iwa da khut da u Blai.
Ka Susana Khongwir da yarap ko wow pynsñiawthooh kammon wow jied ya i khih i khan deiwa sñiawthooh yei bor yong idæ kamjooh i rukom man yong idæ deiwa leh ya ka SWOT Analysis.
Neiliang won u Father Michael da e u ya ki 6 tylli ki kyndon kammon wow jied ya ki laiñ lai puræ.
Ki khynnah wa da chimbynta da pynsñiaw ki yei sñiawngooh yei myntoi wa da yoh ki na kani ka e sikai.
