Jowai: Ka Diakonia Social And Development Society yong ka Jingiaseng Samla Shangpung Presbytery da pynman ko ya ka e sikai (Training) hajrong ka Youth Leadership and Personality Development ynnin ka 22 tarik ha ka chnong Shangpung Mission dei ya krehlang waka Nehru Yuva Kendra Sangathan Jowai (Ministry of Youth Affairs and Sports Government of India) kawa da kyrchaan poisa da ka Department of Personnel and Training (DoPT) yong ka Sorkar India lyngba ka Meghalaya Administrative Training Institute (MATI), Shillong.
I thmu kani ka Training toh wow e sikai ya ki khon khynroo khyllood yow ye ki u im deiwa bha wa miat, wow em ka kitkhlieh na i bynta ka yap ka im, ka bha ka miat yong ka imlang ka sahlang wei wow e chakri wa hok ya ka jaitbru wa ka ri hi waroh kawi khlem da kheiñ ya ka niam wa wan ki. Wei wow sikai leh wa kammon ki khynroo khyllood yow lait ki na i myllien wa sih deiwa booh ya ka thong ha khmat khnang wa ka mynried yong ka pateiñ u man ko kawa chongsuk chong saiñ.
Ha kani ka sngi ki phang wa e sikai waphær waphær kam ka Leadership & Personality Development (Communication, Interpersonal Skills, Attitude Management); Youth-Social Transformation & Responsibility; Career Guidance; Life Skills wa kiwi kiwi ki e sikai man ki kiwa e myntoi bha ya kitu wa wan ha kani ka sngi.
Ki waheh wa emlang ha kani ka sngi toh u R. Sten MDC yong ka 12-Barato-Mukroh Constituency kam u kongsan ha kani ka e Training, u D Rapsang District Youth Coordinator NYKS Shillong; u H.B. Lyngdoh District Statistical Office, Tura; ka I. Warjri Assistant Director yong ka MATI, Shillong; u T.Sawian -Teacher and Founder of Winner’s Mind Foundation Jowai kiwa man kam ki Resource Person ha kani ka e Training wei da emlang u Assistant Director wa pait ya ka Personal Development yong ka Meghalaya Administrative Training Institute, Shillong u H.H.L Khyriem.
U Secretary yong ka Diakonia Social & Development Society JSSP u Sarlangki Dkhar da e u ya ki kyntien e khublei deiwa sñiawngooh ya ka yung krehkaam ka NYKS Jowai wa ka MATI kiwa da smat wow yarap ya ka Society wow yoh pynman ya kam kani ka Training ha ka sien wa nyngkong dooh ha Shnagpung kawa emkaam hadooh kattæ katæ neibynta ki khynroo ki khyllood wei da pynsñiaw u leh yei sñiawngooh ya waroh kat kiwa ya embynta wow pynman ya kani ka sngi kawa jop.
Discussion about this post