Kamwa ha kylleiñ ka pyrthai da kynmoo warom yaka World Egg Day khlieh u snem haka sngi Thohdeiñ yong ka tayaw wa ar yong u Naichiphaw, kamtæ neiliang ka District Poultry Farm, Jowai, West Jaiñtia Hills leh ynnin ka sngi da pynman ko ka yalang kynmoo warom ya kani ka sngi haka yalang wada pynman ha Children’s Home Mihmyntdu hajrong ka phang “Eat your egg today and everyday”.
Ya kani ka World Egg Day da sdang da ka International Egg Commission haka Conference wada man ha Vienna ha u snem 1996, hajrong ka thong wow pynsñiawthooh yaki paidbah heiyatoh wa i myntoi i doh i pran nei baam pylleiñ.
Da ong wa neiwa baam yaka pylleiñ, yarap ko u pynmih kamwa 6 gm i Protein wei pynmih ko kamwa 13 ki jait wa emkaam i doh i pran namo ki Essential Nutrients.
Chooh chooh da ong wa kani ka sngi man ko leh yow pynpsiah hei thij i pyrkhat ki khynroo khyllood wa i pynmih ya ki pylleiñ man ko ka laad kamai neibhah i dawa pylleiñ toh kawa joor bha ha kini ki sngi katwa kiwa pynmih won duna.
Ya ka yalang ha kani ka sngi da pynlai da ka Dr. Evalinda Passah wei da yoh i klam pdiang sñiawbha naka Superintendent ka Children’s Home Mihmyntdu.
Kiwi won wa e i klam ha kani ka sngi kynthup ya u Dr. D.I. Kjam District veterinary Officer, West Jaiñtia, i klam na Dr. Rimiky S Mannar hajrong ka phang ‘Poultry farming a source of improving livelihood’ namo ka ri syiar kam ka laad kamai wa na Dr. Ferdinee Dhar wa klam hajrong ka phang ‘Nutritional benefits of eggs’ namo i myntoi wa yoh na ka pylleiñ.
