Jowai: Ka pynsñiawthooh paidbah chaphang ka Legal Awareness Programme on Crime against Women and NALSA (Victim of Trafficking and Commercial Sexual Exploitation) Scheme 2015 da pynman da ka District Legal Service Authority (DLSA), West Jaiñtia Hills District, Jowai ynnin ka 24 tarik ha Wahiajer Community Hall, West Jaiñtia Hills District.
Deiwa pyrkhat wa joor i ku ki kaam pyrchah ya ki kynthai kamjooh ki khynnah kynthai hapoh ka District, ka D. Sohtun, Secretary ka District Legal Service Authority da pyntip ko wa ka yung krehkaam ka District Legal Service Authority hapoh i pait u Chairman ka West Jaintia Hills District Session Judge u E. Kharumnuid da pynman ya kani ka pynsñiawthooh paidbah yow tip ki chynrang wa kynthai ya kiwa jia na ki sngi cha ki sngi wei wow yarap pynduna ya kini ki kaam pyrchah aiñ wei i yarap wa ye u yoh yaleh mukotduma lyngba ka Legal Service Aid ka DLSA.
Ki bru chemphang wa da klam ha kani ka sngi kynthup yaka SI I. Kharpran, Jowai Police Station, ka R.D. Kynjing, District Child Protection Officer, Jowai, ka R. Kya, Legal Aid Counsel, Jowai, ka Dr. J.N. Shullai, Chairperson, MACWA wa ki dkhot ka DLSA, Jowai da klam ki hajrong kiwa boon ki phang wa yatoh wa kani ka phang. Da kyntu ki ya ki manbei manpa wow pait bniah ya ki kaam wa leh ki khon ki wei wow yajan wow man lok wa ki khon ki kti ki. Da ong leh wa heipor wa mih lai skur, lai puræ, lai kreh, ki khon yong ki da chah phon ki ha ki bru wa em i thmu wa sih deiwa kular kreh ya ki tangwa hadien da chah pynbor ki wow leh ya ki kaam wow dai ya i doh i pran yong ki. Kamtæ da kyntu leh ya ki khynnah wa ym toh u chah pynbiej ki ha kiwon kiwon wei wow husiar hawa pynemkaam ya ki Social Media.
Ka SI Kharpran da klam ko chaphang i takit ki pulit wa i pynchitom katkam ka aiñ Immoral Trafficking Prevention Act, 1956. Ka R.D Kynjing, da klam ko ya i yarap wa e ya kiwa chah leh bakla cha leh khlem akor wa ki ya syllok wa da e, ka Kya da klam ko chaphang ka thong ka NALSA (Victim of Trafficking and Commercial Sexual Exploitation) Scheme 2015 kawa e yarap mynkna wow yaleh mukotduma ya kiwa chah ktah ha kini ki jait kaam.
Hawa batai won yei ktah i dih drug, ka Dr. Shullai da sneiñ ko ya ki khynnah skur wow yait wow kyntiat ya kiwon kiwon ki jait drug. Da klam ko leh wow yait na i thiah kurim lait noh hadien wa dep bia yow lait u yoh ya u khniang HIV wa kiwi ki jait kjut wa mih na kini ki kaam wa tip kima ki STD.
Ka B. Blah, Block Development Officer, Thadlaskein C&RD Block hei klam yong ka da pyntip ko ya kiwa boon ki kaam yarap yoh khih namo ki Livelihood Schemes wa da pynkrehkaam naka Block Office neibynta ki kynthai, da klam ko leh chaphang ka NREGA Scheme kawa e kreh ya kiwa em Job Card kiwa da em 2017 ngut ha Wahiajer heiwa 74% toh ki kynthai, da klam ko leh chaphang ka National Rural Livelihood Mission (NRLM) Scheme, wei da pynchlur ko ya ki kynthai wow chim kabu ya kini ki Scheme sorkar yow pynku yaka yoh ka kot yong ki.
Discussion about this post