Kam chibynta ka pynsñiawthooh ha waroh ki bynta ka ri namo ka Pan India Awareness Campaign deiwa lai cha kylleiñ ki thaw, neiliang ka District Legal Services Authority (DLSA), East Khasi Hills District deiwa ya krehlang waka Meghalaya State Legal Services Authority hapoh i pyrtuid ka National Legal Services Authority da pynman ki ya ka Mega Camp cum Health Camp ha Majai kawa em hapoh ka Sohra Civil Sub-Division ha ka 11 tarik uni u bnai.
Ya ka Health Camp da wan wow wai ya ka da u Noor Ain Khan, District & Session Judge, East Khasi Hills District deiwa emlang u T.T.M. Sangma, Officer on Special Duty, MSLSA, ka J. Umdor, BDO, Shella-Bholaganj C&RD Block, ka Dr. A. Lyngdoh, Addl. DMHO, East Khasi Hills District wa kiwi de.
U Khan hei klam yong oo da ong u wa ya kani ka Health Camp da pynman ha ini i thaw wa rap em cha kdong ka District yow yarap ya kiwa chong chnong u yoh ki yei sumaar. Da pynchlur u leh ya ki paidbah ka Majai wow wan chakhmat yow chim kabu ya iwa da wanrah ha kani ka Camp.
Najrong ka Medical Camp, ka yung krehkaam u District Medical and Health Officer wa District Social Welfare, East Khasi Hills District da booh ki leh ya ki dukan yow pynsñiawthooh ya ki bru ya ki kaam yarap wa ye ki u yoh neiliang ka sorkar.
