Kam chibynta ka International Day Against Drugs Abuse & Illicit Trafficking, ka yung krehkaam yong ka District Social Welfare Officer, West Jaiñtia Hills District deilang waka Breakthrough Rehabilitation Centre Khliehtyrchi ynne ka sngi da pynman ki i pynsñiawthooh yaki khynnah skur hajrong i sih i pynemkaam drug wa kiwi won ki jait dih pynmuaid iwa ktah ya u bru kamjooh ka yung ka sem waka imlang sahlang.
Yaka yalang pynsñiawthooh da pynman ha Ladthadlaboh Community Hall, Jowai wa pynlai da u Rev. L. Garod wei ka phang yong uni u snem toh “Addressing drugs challenges in health and humanitarian care & crisis”.
Ka J. Synnah, District Social Welfare Officer, WJH hawa klam yahkhmat da pynche ko yei yumut kani ka sngi deiwa ong wa ya kani ka sngi da jooh kynmoo khlieh u snem, wei ha uni u snem man haroh ko kam chi bynta ka Azadi Ka Amrit Mahotsav namo ka lehkmen yei lyngkhooh dap 75 snem i yoh laitlooid ka ri.
Ki bru chemphang wada e yei klam ha kani ka sngi kynthup ki ya ka D. Bareh, Field Co-Ordinator ka SURE kawa da klam hajrong ka phang “Basic of drug, causes of drug abuse and addiction” ka Dr. A. Paswet, Psychiatrist ka Jowai Civil Hospital Ïalong kawa da klam hajrong ka phang “Ill effect of drug on family and individual health, physical & mental symptoms with treatment”, u J. Syiemlieh SI naka chnat pulit da klam u hajrong ka phang “Narcotics drug and psychotropic substance Act 1985”, katwa u Riquoma Rq. Laloo, General Secretary ka Synjuk Waheh Chnong Jowai, da klam u heiyatoh i man i long i drug hapoh chnong Jowai.
Yaki kyntien e khublei da yoh na u Shaphrang Hiwot Dkhar, Coordinator ka Breakthrough Rehabilitation Centre Khliehtyrchi.
Chwa ini da em leh i chim kular wow pyndooh jait ya i drugs hapoh ka ri kawa man katkam ka thong yong ka Nasha Mukt Bharat Abhiyaan.
