Ka Education Committee yong ka Seinraij Jowai ha ka 21 tarik ha Yungwalieh ka Loompyrdi Iongpiah da pynman ko ya ka yalang e hikai wa kyrpang ya kiwa sikai skur chaphang ka NEP-2020.
Ha kani ka pynsñiawthooh da wan ya chimbynta da kiwa sikai na ki skur waphær wa kynthup ya ka Seiñraij Higher Secondary School, Jowai, Dulong Secondary School, Jowai, Panaliar Secondary School, Jowai, Dulong UPS SSA, Panaliar UPS SSA, Loompyrdi Iongpiah UPS, SSA, Pohmusiang SSA UPS, Chilliangraij SSA UPS, Presbyterian Secondary School, Jowai, Loompyrdi Iongpiah LPS, SSA najrong ki waheh wasian, manbei manpa ka Seiñraij.
Ha ka yalang yahkhmat yong kani ka sngi, hei pynlai u Juhi Nanghuloo, Chairman Education Committee, Seiñraij da yoh i ngoohblai ngoohsyiem na ka Wandalan Dkhar katwa u Hercules Toi, President Seiñraij Jowai da khana batai u malu mala chaphang ki rukom yoh myntoi ki khynnah deiwa sdang u pynkrehkaam ya ka NEP-2020.
U Juhi Nanghuloo hawa klam yahkhmat da pynsñiaw u ya ki san tylli ki mat kyrpang yong ka NEP-2020 kiwa kynthup ya ka Accessibility, Equity, Quality, Affordability waka Accountability.
U Dr. Raj Kumar, Principal JNV Rymbai, East Jaiñtia Hills kam u bru stat bru chemphang yong kani ka sngi, da ong u wa ka ri India da lai luti ko kattu la le sien wow pynthymme næ pynjanai ya ka National Education Policy, kawa nyngkong ha u snem 1968 heiwa ha uni u snem da chim ko ka laad ka luti kammon wow kyntu kynrong yei puræ puthi deiwa pynchlur ya ki khynnah wow lai skur ki. Ha u snem 1986 ka sien wa ar da pynlai pyrkhat ko wow kyntu kynrong yei puræ puthi lyngba i pynkrehkaam ya ki kor Computer katwa ha kani ka NEP 2020 da booh thong ko wow kyntu kynrong yei puræ puthi yong ki khynnah ha waroh ki liang.
Chooh chooh da ong u leh katkam kani ka NEP 2020, kiwa sikai ymtoh ware u pynchong yurim ki du kat yeiwa ye ki khynnah u yoh ki Marks wa heh iwa kyrpang leh emkaam u saiñdur saiñdar yei man i long yong ki liang wanang nadooh i chait i khiah, i sap i ka-it, i akor i burom wa kiwi kiwi.
Discussion about this post