Ka Elaka Labang Nangphyllut hei yahkhmat ka Labang Nangphyllut Pangam Raliang Area Committee (LNPRAC) da yoh ko u pynman yaka yalang namo ka lympung wow pynneh pynsah yaka riti ka dustur haka 29 tarik u Thohlakhmi ha ka chnong Lamarang.
Ha kani ka yalang, u syiem warim ka Hima Mylliem, u Pa’iem Laborious Manik Syiem da man u kam u kongsan, ka Dr. Fenella Lyngdoh Nonglait kam ka symbood kongsan deiwa emlang u Benjamin Thabah, Superintendent of Police wa pait yaki thaw khappood, u Aiborlang Shadap, MDC Barato Mukroh, u Army Lipon, President Synjuk Waheh Chnong Ri Jaiñtia, u M.M. Thaiang, Secretary ka Labang Nangphyllut Pangam Raliang Council, u Chandame Sungoh, Chairman ka Hynñiewtrep Border Dispute Redressal Forum kam kiwa chah khut sñiawbha.
Da emlang leh u Acting Dolloi kani ka Elaka, u Prolin Samaïang, ki waheh chnong, ka Bei Langdoh ka Raij Nangphyllut, ki Tymmen, ki San, ki Sangot, ki Maji, ki Chutia, ki Dhulia wa ki waheh wasian kani ka Elaka deilang wa ki paidbah wym duna ya 3000 ngut.
Yaka yalang da pynlai da u Comingson Dkhar, u Chongknor ka Labang Nangphyllut Pangam Raliang Area Committee.
Hei klam kam u kongsan, u Pa’iem Laborious Manik Syiem da khana u yei tre yei thied ka jaitbru Ynñiaw Trep Ynñiaw Skum wa da pynchong pynsah u Blai Tre Kirot ha kani ka ri wa maya ki blai. Da pynkynmoo u leh wa hadien i laitlooid naka sorkar pharæng da pynyabi waka India wow man kam ki nong India lyngba ka Instrument of Accession waka Annexed Agreement wa da yasoi hapyrdi ka Federation of Khasi States waka Jaiñtia Durbar haka 16-08-1948. Da khana u leh yei man kyrpang ka rukom synchaar khadar heini ha ri Khasi Jaiñtia wa wot ki bru waheh ka sorkar pharæng wa ki bru waheh ka India leh da yaroh ki.
Neiliang ka Dr. Fenela Lyngdoh Nonglait da khana tbian ko yei lai luti yong ka kam ka bru wa da pyndep pura yei puræ yaka aiñ wei da yoh ko leh yei kyrdan Doctor ha ki kaam aiñ. Da pynsñiaw ko da kwah ko wow yakhun Election MP na Shillong Seat na ka BJP wei ym pynbor ko yaki bru wow psiah BJP, wei ka da psiah BJP ko neibynta kiwa chong chnong ka Meghalaya.
Da sneiñ da kyntu da e bor e mynsien wei da kular ko wow rah ya ki mat ki yura yei eh yei khoo ki bru ka Labang Nangphyllut wa Pangam Raliang chakhmat ka sorkar India. Kular haroh ko u yasaaid neibhah yong ki wot lada emkaam u yasaaid ha Supreme Court leh neibhah ka da man chwa ko ka muktiar ha Supreme Court.
U Benjamin Thabah, S.P In-charge Border da kular u wow pait yei chongsuk chongsaaiñ ha ki thaw khappood wa heiyatoh waka Block-I, da ong chooh chooh u wa ka Police Department smat ko u yakrehlang wa ki chnong ki thaw wow pynneh yei chongsuk chongsaaiñ.
U MDC ka Barato Mukroh, kam u thyrñia uwa yahkhmat wow soor wow syrdep ya kani ka that jæd (Block-I) da e u yei yaroh yaka Labang Nangphyllut Pangam Raliang Area Committee wa ya kiwa chong chnong ka Elaka Labang Nangphyllut wa ye ki u pynman ya kani ka yalang, wa ya ki bru kani ka thaaiñ wot hapyrdi i eh i khoo leh wa dang man ki kiwa ri wa syndong wa pynneh pynsah yaka ktien ka thylliej yaka niam ka rukom ka riti ka dustur.
U Army Lipon, President Synjuk Waheh Chnong Ri Jaiñtia da kular u wow ya krehlang wa ki Waheh Chnong kani ka Elaka wow wanrah yei miat yei bha yei lai bait lai ryntih haka synchaar chnong synchaar thaw. Da ong u leh wow yaklam u waka Jaiñtia Hills Autonomous District Council wow pynsmat ko u e bor ya u Acting Dolloi kani ka Elaka wow e sanat ya ki Waheh Chnong lait noh u ong ya ki dei Goanbuda kamwa ong ki Karbi ki Assam yow tip noh dei kyntien Waheh Chnong.
Waroh hi kiwa klam ha kani ka sngi da pynap pynsñiaw, da sneiñ da kroo da e bor e mynsien ki ya ki paaid wa chong chnong kani ka thaaiñ wow man kiwa ye neh ye chah wa kiwa yatylli ya ryntih. Da kular ki leh wow yarap ya ki la ha iwon iwon i rukom wa ha iwon ha iwon i por wa emkaam.
Da pynphooh pynphieñ ya kani ka yalang dei chaad pliang naka chnong Lamarang, ka chaad Lahooh naka chnong Deiñler, i chaad naka chnong Arbon, ka Phawar Lahooh naka Raij Labang, ka chaad Pastieh naka chnong Lamarang waka chaad ñiam ksoh klong ksoh skoo naka chnong Madan Nangkylla wa kiwi kiwi.
Discussion about this post