Ka Dorbar Chnong Huroi wa Lahalein, East Jaiñtia Hills District hapoh ka lama ka JACwa kynthup ya ka Dorbar Chnong Hingaria, Huroi, Lahalein wa Lejri ha ka 9 wa 10 tarik uni u bnai da pynman ki ya ka Free Medical Camp neibynta ki paidbah kini ki chnong. Ya kani ka e sumaar mynkna da kyrchaan da ka CSR Department, Star Cement Ltd, Lumshnong. Da em leh arngut ki Doctor kitæ Dr. I. M. P Rymbai, MBBS wa Dr. D. Rymbai, MD (Ayush) deilang wa ki wakreh lang wa ki kiwa da pait da sylli yei chait i khiah deiwa e dawai leh dei mynkna.
Kini ki chnong hadien wa da pait bniah ki yei emkaam ki bru, da rai ki wa emkaam wow pynman ya kani ka Medical Camp pyn hapoh ka chnong hi yow yarap ya ki paidbah khamtam ha kini ki por wa em ka khlam COVID-19 heiwa da em ki bru wa kjut tangwa da artatien ki wow lai Doctor neidaw wa em ki kyndon ka khlam.
Ha kini ki ar sngi da sdang nyngkong chwa ha Huroi ha ka 9 tarik heiwa da em kamwa 200 ngut ki bru na kiwa boon ki rta kiwa da yoh myntoi. Ha ka 10 tarik da pynman won ha chnong Lahalein heiwa da em kamwa 80 ngut ki bru kiwa da wan chakhmat.
Neiliang ka Dorbar Chnong ka Huroi wa Lahalein deilang wa ka JAC da e khublei ki ya ki Doctor wa ki wakreh yong ki kiwa da poi cha kini ki chnong wa em hajan u pood wa ka Bangladesh ki wym em sarok, i bordiñ wa ki Mobile Network. Heiwa kini ki Doctor da poi ki cha ki chnong da ki kari 4X4 wa ki lieñ.
Da e khublei leh ya ki CSR Department, Star Cement kiwa da kyrchaan ya kani ka Free Health Camp da ka poisa wa da i mynsien yarap. Da e khublei leh ya u Emlang Lamare, MDC ka thaaiñ uwa da e yei kyrchaan yong oo.
