Kam chibynta wow pynmih poisa yow ye u pyndep ya ki kaam wa da sdang, ka Jingiaseng Kynthei KJP Synod Sepngi deiwa ya krehlang waka Mawkhar SC da pynman ki ya ka lympung yaleh Futsal kawa le sngi hapyrdi ki Presbytery waphær waphær ha Madan Student, Jaiaw heiwa ka Shiparalok-Jingiaseng Kynthei Mairang Presbytery da yoh ko yei naam Champion ynnin ka sngi.
Ka Shiparalok da jop ko ya ka Jingiaseng Kynthei Rambrai Presbytery da 6-2 wei da yoh ki leh ya ka songpoisa kawa T. 35,000 katwa kawa rem won da yoh ko T. 15,000.
Ha kani ka Final da emlang leh u MP ka Shillong, u Vincent Pala kam u kongsan wa u President ka Mawkhar SC, u Ransom Sutnga kam u symbood kongsan.
Lyngba kani ka lympung, ka Jingiaseng Kynthei KJP Synod Sepngi da thmu ko wow pynmih poisa neibynta ka Counselling Centre ha Shillong, ka skur wa em ha Umsaitjain wa ka Assam Mission.
Waroh da em 32 tylli ki liang wa da chimbynta ha kani ka lympung kawa da sdang ha ka 25 tarik kawa da wan wai da u MLA ka North Shillong, u Adelbert Nongrum.
U Ransom Sutnga hawa e yei klam da ong u wa ka Mawkhar SC kawa yalehke ha ka Shillong Premier League, da yoo ki ya kiwa em sap ha kani ka lympung deiwa yaroh leh ya kiwa pynman kamjooh ya waroh kiwa da chimbynta deiwa kular u leh wow e kyrchaan ya ka Jingiaseng Kynthei KJP Synod Sepngi ha ki kaam yong ka.
Neiliang u Vincent Pala leh da e khublei u ya ka Jingiaseng Kynthei KJP Synod Sepngi ya waroh ki kaam wa bha deiwa ong wa i chait i khiah toh iwa emkaam wei i pynman ya kam kini ki jait yalehke daw yarap ko ya ki khynroo wow lait ki na ki kaam wa sih kam i drugs.
Neiliang ka Jingiaseng Kynthei KJP Synod Sepngi da e khublei ko ya kini ki arngut wa da wan ki wow chimbynta ha kani ka Final, deilang wa ki waheh wa ki Pastor ka Balang. Da e khublei kyrpang leh ya u Ransom Sutnga wa e u ya ka song poisa kiwa jop wa u MLA ka Mawlai, u PT Sawkmie yei e u ya ka poisa kiwa rem.
