Ka Jaintia Network of Positive People (JNP+) ka seiñ wa khreh neibynta i bha i miat ki bru wa im wa u khñiang HIV, ynne ka sngi da kynmoo warom ko yaka International AIDS Candle Light Memorial Day chirup i krehlang waka Meghalaya AIDS Control Society Shillong ha MCSWA Conference Hall Salaroh, Jowai.
Ka Dr. Rida Pusein wa pait yaka ART Jowai Civil Hospital Ialong hei klam yong ka ha kani ka sngi da ong ko wa ya kani ka sngi da sdang u kynmoo warom nadooh ka 02-04-1983 ha San Francisco, USA wa ha man ka tayaw wa le u Naisan.
Kani ka sngi man ko ka sngi wow kynmoo warom ya kitu kiwa da khlaad na i kjut AIDS heijooh i por man haroh ko ka sngi kawa pynyoo pyrthai yei kyrchaan ya kitu kiwa dang im deilang wa uni u khñiang HIV kamjooh ya kiwa ha yung ha sem yong kiwa sumaar ya ki.
Da ong haroh ko wa lyngba ka National Aids Control Organisation (NACO) da booh ko ka thong wow pynkut noh ya kani ka kjut kawa man kam ka khlam ha lane chwa u 2030.
Kamtæ kam ki paidbah toh u pynyoo yei kyrchaan wa pura yaka NACO khnang yow ye u poi cha ka thong deiwa e i yaka pynsñiawthooh paidbah heiyatoh wa uni u khñiang, u pynchlur i ya kiwa em ya uni u khñiang wow wan mih ki chakhmat u chim ya u dawai ART kamjooh u pyndooh i yei pait beiñ yoo beiñ yaki bru wa em ya uni u khñiang HIV khnang wa ka thong yong ka NACO wow pyndooh pyndam ya kiwa yoh thymme ya uni u khñiang wow man i nod, wym hoi de u em uwi leh wa yap na uni u khñiang, wei wym hoi u em kiwa chah klam beiñ heiyatoh wa kiwa em ya uni u khñiang ha lane chwa ka 2030.
Ha kani ka sngi da em i suki kamwa chi minit, i thang ya i mombati wai i khana chaphang i im wa uni u khñiang da u dkhot ka JNP.
Kiwi wa e yei klam ha kani ka sngi toh u Ajoy Lanong wa mihkhmat naka MACS, ka Dr. JN Shullai Director MCSWA, ka Sunita Suna PM MCSWA, u B. Kharmalki, u R. Suchiang, President JNP, u M. Biate, Secretary JNP+ wa kiwi kiwi ki dkhot ka JNP+ wa kiwa kreh ka MCSWA.
