Ka Jaintia Network Society (JNS) hei ya krehlang wa ka Nehru Yuva Kendra Sangathan Jowai (NYKS) da pynman ki ya ka pynsñiawthooh paidbah hajrong ka phang “Keep Village Clean & Green” iwa mut “U pynman ya ka chnong kawa khooid wei kamjooh kawa yirngam” kawa da pynman ynnin ka sngi ha ka chnong Pynthor Langteiñ kawa haap hapoh ka West Jaiñtia Hills District.
Ya kani ka yalang da pynlai da ka P. Lamare, President yong ka Jaintia Network Society. Da yoh ya ki kyntien pdiang sñiawbha na u khynroo D. S Lipon. Da emlang ha kani ka yalang u waheh chnong, secretary shnong, u Rev. L.O. Garod, ki khon khynroo ka chnong wa ki manbei manpa leh kamjooh.
Ka D. Nongtdu kawa man kam ka Resource Person namo ka bru wa chemphang ha kani ka yalang da pynsñiawthooh ko hajrong ka phang “Keep Village Clean & Green”. Da batai ko leh yei emkaam yong i khooid i jngiar hapoh ka chnong ka thaw, we i ma wa mih na i tngit i sma wei i pynemkaam palat ya ki Plastic.
Da ong ko leh wa i pynemkaam ya ki Plastic nang joor i katwa dang mih ki sngi, wei ini booh ko hei ma yei im wa man-ka-sngi yong i ki bru, ki mrad wei kamjooh leh ya ka bei rymaw waroh kawi. Da kyntu ko leh ya kiwa ya emlang ha ka yalang wow chim yei kitkhlieh samen samen yow man ka nongmuna ya kiwi wow lehkhooid ha yung kamjooh leh cha lait yow yoh ya i doh i pran wa chait wa tram wa ka chong ka thaw kawa khooid wa suba.
Da saam leh ya ki tre dieñ cha u waheh chnong, ki muna that cha waroh kiwa ya emlang ha kani ka sngi yow pynduna yei pynemkaam Plastic, ki tadong booh jhep ya ki yung chnong, ki skur hapoh chnong wa ki Aganwadi Centre.
Da em leh i ya thung dieñ hapoh ka chnong wei kamjooh leh i dro cha ki kynroh chnong ya ki kyntien pynsñiawthooh ya ki paidbah ka chnong yei emkaam i leh khooid hapoh chnong hapoh thaw.
Da pynwai ya kani ka yalang dei kyntein khublei na u E.M Lipon, Secretary ka chnong.
