Jowai: Ka seiñ Jaiñtia Student’s Movement (JSM) kamwa khlieh u snem jooh pynman ko yaka yachemlang næ ka Annual Meet, ha uni u snem won da man ka sieñ wa ynñiaw i yachemlang yong ka wa da pynman ynne ka sngi ha District Library Jowai, heiwa da wan emlang ki dkhot ka seiñ naki Circle, ki Region, ki Unit waphær waphær deiwa sakhi lang kiwi ki seiñbhalang wa kynthup yaka JYF, JSU, HYC wa kiwi.
U Phasmon Dkhar, MDC ka JHADC kam u kongsan yong kani ka sngi, kyntu u wow man kiwa yatylli yow jop ya kawon kawon ka thong, wym toh u chim kabu donhi nei man seiñ.
Kamwa ka JSM man ko kawi naki seiñ wa embynta yakhih dawa ILP haka jylla, pynsñiaw u wa oo leh kwah hi u wow yoh yaka ILP, tangwa heiyatoh weini kyntu u wow man kiwa yai chah neibhah chong hei bor ka sorkar bei.
“Neiliang hi ka sorkar jylla da yaleh chitom ko wow yaklam heiyatoh kani ka kaam, heiwa u Montri Rangbah leh man-i-por yachem u wa u Lat ka jylla,” ong u Phasmon Dkhar.
Ong haroh u wa emkaam hi u em ki seiñbhalang wow dawa ya kawon kawon ka phang heiwa ka sorkar jylla u pynyoo ko cha ka sorkar bei yeiwa emkaam.
Heijooh i por kular u wow emlang waki seiñbhalang neibynta kawon kawon ka phang yong ka jaitbru, hanla toh iwa dawa wot u yachem wa u Montri Rangbah, tangwa ya kattæ chooh kyntu u wow yang chwa u pait kammon yah ka luti.
Sa iwi leh ong u wa i wan ka khlam COVID-19 pynslem bha ko yei krehkaam haki chnat krehkaam, wei wot haka District Council kamjooh.
Ha kani ka sngi da pynlait leh yaka Calendar, da sam kymmor cha ki bru wa dooh wa kynthup ya uwi wa em duna hei doh i pran, neitæ da saam leh ya ki Mementoes cha ki dkhot wa chitrhem ka seiñ wow kreh, nalor i chaad i rwai wada e daki dkhot ka seiñ naki Unit ki Zone waphær waphær.
Nalor wa da pynsñiaw yei lai luti ka seiñ ha uni u snem 2020, da u Roitre Dkhar, General Secretary Central Body, da yoh leh i klam na u L.S. Rymbai President JSM Central Body, i klam na u Roming Lamare yong ka HYC, u Jersome Shylla yong ka JSU wa kiwi.
Haka General Election yong ka Western Region wada pynman hei janmiet kani ka sngi, u Sunni Bareh da man u kam u President, u Vice President u Nick Son Sungoh, General Secretary u Chancellor Talang, Assistant Secretary u Shanskhem Suchiang nalor kiwi won kiwa da jied wow ksoh yei kyrdan waphær waphær.
