Jowai: Ka seiñ Jaiñtia Youth Development Society (JYDS) kawa imsngi da ki kyntien ‘Action with Vision’ hapoh i yahkhmat u Damanleki Lathong kam u President, haka 5 tarik da pynman ko yei pynsñiawthooh paidbah ha Iawmulong yong ka chnong Sahsniang West Jaiñtia Hills District hajrong ka phang “Vote For Change” namo yow man kiwa stat u jied ya kiwa mihkhmat kiwa ye u wanrah yei kylla ha ka imlang sahlang.
Kani ka pynsñiawthooh hajrong ka phang “Vote For Change” wym em mut du hei wow jied ya kiwa mihkhmat cha ka yungdorbar chna aiñ MLA næ MDC, tangwa man ko leh hajrong i jied ya kiwon kiwon ki bru da ki paidbah yow man ki kam kiwa yahkhmat neibynta u kreh ya ki kaam wa bha wei wow wanrah i kylla ha ka imlang sahlang.
U R. Thubru hei klam da ong u, i jied hi ya ki bru ym mut du neibynta kitu ki wow kreh ya ki kaam paidbah tangwa hadooh i chongkha chongman kamjooh toh u man kiwa stat u jied yow bru næ ka bru.
Kamtæ yow ye wanrah kylla nyngkong u em chwa i angnood ha i nalor wow chaniah da i ya i hi, wym hoi u chah pynngop lyngba i bor ka poisa næ ki ktien wapah waphon kawa man kam i thied yei hok i sñiaw yong i, neitæ wymtoh u hun wow neh sah kamjooh khlem i roi i paar.
“Ya i da pynkhamti daka riti shynchaar ka ri wow yoh yei hok longbru manbru, wei i im haroh i haka ri laitlooid, tangwa boonsien wym sñiawthooh i yei hok wei dooh i chaniah da i ya i hi, kamtæ wan sei chah ñion beiñ ha kiwa boon rukom haka imlang sahlang,” da ong u Dawan Lyngdoh hawa e yei klam.
Neiliang u Jimmy Kharmuti da ong u, yow ye u wanrah yei kylla hei rukom im toh u man kiwa stat wow jied næ seiñ yurim chwa nadooh na yung, lym kamtæ kammon u tip wow jied ya kiwi won kiwa yahkhmat wa rap hakhlieh wei emkaam u man kiwa stat u jied ya kiwa mihkhmat nadooh kiwa khian hadooh kiwa heh tam yow yoo yei kylla.
U Damanleki Lathong kam u President ka Society da kyntu u wa toh u pyrkhat bha chwa wow jied ya kiwa mihkhmat neibhah u pynmyntoi ya ki khon ki kti wa ka pateiñ hadien, da ong u leh i daw wa kam ka Society chim ko ya kani ka yukit wa wanrah ko kam kani ka pynsñiawthooh paidbah toh hajrong ka yurim waka imlang sahlang neh ko kamjooh khlem i kylla.
Da kylli u wa kam ki paidbah hachwa u jied ya ka mynried mankawi lyngba ka hok wa i em i, jooh pynchong yurim wei pyrkhat bha i mo? Deiwa kyntu wow pynemkaam hok ya ka Vote yong ki neibynta ka imlang sahlang wa ka mynried ki khon ki kti ka jaitbru.
Hawa kyruiñ won u cheiwi liang da ong u, i chah thombor man i ha kiwa boon rukom neitæ i daw emkaam u yoh kiwa yahkhmat wa em i kitkhlieh kiwa sñiawthooh, wa ye u saiñdur wei yajan cha u paidbah nalor wow sñiawthooh yei eh i khoo kiwa dooh.
Kiwi won wa e klam ha kani ka sngi kynthup ki ya u Secretary ka Iawmulong u Iowis Laloo, u Waheh Chnong ka Sahsniang Saitthad u B.Sten wa kiwi kiwi.
Discussion about this post