Ka Khasi Students Union Barato Unit ha ka miet ka sngi khaddooh u 2020 da pynman ko ya ka lehkmen e khublei snem warim kamjooh yow pdiang ya u snem thymme deiwa pynman ya ka thnag diñ Bonfire ha madan Mukoi U Bon, Barato heiwa ya kani ka yalehkmen da pynlai da u Organising Secretary u Pynkyrhai Sten wei da yoh yei klam waiphang na u President ka seiñ u H. Ehbok Sten uwa klam chiboon ki bynta neibynta i bha i miat, ki kreh yow kynronglang ya ka suk ka saiñ ka imlang sahlang dei mynsiem maya wei yatylli.
Da pynsñiaw u leh cha ki paidbah ya ki kattu katni i rukom lai luti ka seiñ kamjooh da pynche pynsñiaw cha ki paidbah heiyatoh wa ka ILP wei i emkaam yong ka hapoh ka jylla yong i.
Da yoh leh yei klam tbian na u President ka Chaphrang Iong I Sports Club Barato heiwa da emlang u Secretary wa ki dkhot yong ka Club, da yoh leh yei klam tbian na u Waheh Dong (A) kamjooh na u Waheh Chnong yong ka Barato kiwa da khut yei ya krehlang chirup wa ka chnong ka dong neibynta i bha i miat Tip Bru Tip Blai.
Hadien ini da thang ya ka Bonfire da u President ka seiñ kamjooh i thang ya ki bomkala da u Waheh Chnong wei da yoh leh yei dihcha heiwa da sdang ya ki yalehke droma wa tbian, ki chaad, ki rwai kiwa da chimbynta da ki khon khynnah khynroo khyllood, manbei manpa yong ka dong ka chnong.
Ka Khasi Students Union Barato Unit chim ko leh ya kani ka laad yow e khublei snem thymme deiwa Tipbru Tipblai yow yoh ya u snem wa suk wa kmen ya waroh kamjooh i kyrkhu kyrdoh ha waroh ki liang.
