Ka KSU Vairengte Circle, Kolasib District, Mizoram da pynman ko ya ka Cultural Meet cum Academic Award ha ka 24 tarik uni u bnai ha Vairengte Community Hall, Kolasib District, Mizoram kawa em hajan ka chnong Khasi Veng, kawa man ka chnong wa da chong da sah da ki Khasi nadooh ki por warim hachwa wow em ka jylla Mizoram næ Meghalaya wei wot ka Assam leh.
I thmu yong ka KSU Vairengte Circle wow pynman kam kani ka lympung toh wow pynlum pynlang ya waroh ki Khasi kiwa da chong da sah nadooh nachwa ha ka jylla Mizoram wei wow e mynsien ya kiwa dang lai puræ yow chimkhia ki neibhah wa i puræ puthi toh ka bor wow yada ya ka jaitbru Ynñiawtrep wa em ha jylla Mizoram.
Da ya wan wow chimbynta da ki Khasi wa chong wa sah ha Mizoram kiwa kynthup ya ki Khasi wa sah ha ki chnong Khasi Veng, ha Phaisen wa ha Saipum wei waroh kini ki chnong toh kiwa dang haap ha ki thaaiñ wa em jngai na ki thaw sor wei man ki kiwa dang sahdien ha ka yoh ka kot.
Ki Khasi wa da man tre chnong ha Mizoram da em ki kamwa 115 tylli ki manyung heiwa 80 tylli em ki ha Khasi Veng (Veng mut chnong ha ka ktien Mizo). Da em ki waroh 500 tam ki Khasi kiwa im ja deiwa rep kwai rep pathi.
Ka KSU da pynkha ko ya ka KSU Vairengte Unit ha u snem 2009 hadien i chah thombor ki Khasi ha kiwi won ki jaitbru heh paaid wei lyngba ka KSU Vairengte Unit wa ka Khasi Welfare Committee Vairengte da ye wow pynbait yei kynaad lyngba i yaklam wei yasyllok wa ki heh paaid Mizo wei deiwa wan leh kiwa mihkhmat ka Young Mizo Association Shillong Unit wa ka Mizo Zirlai Pawl Mizoram ha yung krehkaam ka KSU ha utai u snem.
Ha kani ka lympung wa da pynman da ka KSU Vairengte Circle, da khut sñiawbha ya u B. Lalchhanzova uwa man u Montri wa pait ya ki chnat Land Revenue & Settlement wa Food, Civil Supplies & Consumers Affairs kam u kongsan. Da khut leh ya u Donald V. Thabah, General Secretary ka KSU wa ya u H. Vanlalbiakzuava, SDO Vairengte Civil Sub-Division kam ki symbood kongsan.
Da pynkup burom ya 9 ngut kiwa da lehbha ha ka puræ puthi yong ki wot hapyrdi i eh i khooo wa boon:
1. Ka Jessica, khon u Philmon kawa yoh 1st Division ha ka Science, Mizoram Board of School Education (MBSE), High School Secondary Leaving Certificate (HSSLC).
2. U Sakti Sympli, khon u M. You Dhar, uwa da yoh 2nd Division ha ka Science, HSSLC, MBSE.
3. U Augustine Pala, khon u Pitos Manar, uwa da yoh 1st Division ha ka Arts, HSSLC, MBSE. U Augustine da yoh Distinction u leh ha ki Subject Mizo wa Education.
4. U Wanbor Pala, khon u Tarchhian, uwa yoh 2nd Division ha ka Arts, HSSLC, MBSE.
5. U Generous Pajat, khon ka Paulina Pajat uwa yoh 3rd Division, HSSLC, Meghalaya Board of School Education.
6. Ka Elsa Syih, khon u Elias Pajat, kawa yoh 1st Division ha ka CBSE (High School), ka Elsa da yoh Distinction ko leh ha ka Subject Hindi.
7. Ka Catherine Muksor, ka khun u Kemen kawa yoh 3rd Division ha ka High School Leaving Certificate (HSLC), MBSE.
8. Ka Kristina ka khon u (L) Wanmon, kawa yoh 3rd Division ha ka HSLC, MBSE.
9. U Bilansius Ïaineh Pajat, khon ka (L) Senobia Sukmon Pajat kawa yoh 3rd Division, HSLC, MBSE.
Ha kani ka yalang, neiliang ka KSU da yoh ko leh wo yasyllok wa u Montri sorkar yeiwa sahteiñ wow e Land Settlement Certificate ya ki manyung Khasi kiwa da sah nadooh ki por warim tangwa ym pu yoh ki ya ki kot patta næ ki kot wow man tre thaw na ka sorkar Mizoram. Neiliang u Montri da kular u wow chimkhia u bichaar yeini.
Discussion about this post