Ka Kur Sumer Jowai ha ka 18 tarik da pynman ko ya ka yalang paidbah kawa heh bha ha Yungwalieh ka chnong Panaliar, Jowai heiwa da pynlait paidbah leh ya ka Kot Thup Sahkynmoo (Souvenir) yong ka kur da u Kñi Rangbahdooh ka Kur, u S. Quotient Sumer kam u kongsan.
U Hamkom Sumer, ha i klam yong oo da batai tbian u chaphang ka kur nadooh wa da sdang wow wan chong chnong ha Jowai.
Ha i klam wa tbian yong u kongsan, da ong u wa ya waroh ki thaw ha pyrthai, i em i ka yong i ka bynta la ha kawon kawon ka rukom im ka yong i, ym toh wow mylliñ ya ka bei kawa e yei jait i kynja, toh u burom ya ka yung kawa toh ka kyrkhu yong u Blai Tre Kynrad.
Da kyntu u ya ki dkhot yong ka kur waroh wow tip yong idæ, ka akor ka burom wei wow rah ya i naam yong ka kur chaneiñ. “Na khyndaw hadooh bneiñ, da ka hukum ya i, dabooh daseiñ” da ong u. Da e ngooh leh ya u Blai wow yah luti ya ki khynroo ka kur wow ye ki u pyndep ya ini i kaam kawa ki waheh yong ka kur da thrang ki dik dik wow leh.
Da yoh leh i chaad, ki rwai na ki khon khynroo khyllood yong ka kur wei leh iwa kyrpang da yoh i chaad na ki manbei yong ka kur.
