Kam chibynta i thmu i mang ka seiñ yow thung dieñ ha tawiar ka wah Myntdu, u pynbha pynmiat ya ki bynta ka wah Myntdu. Hadien wa da dep thung ya ki 150 tylli ki dieñ Cherry Blossom wa kiwi ki jait dieñ khloo harood u sarok ka yingkieñ Myntdu, wa ki rood ka Wah Myntdu ha Pynthorneiñ, chirup wa i yakrehlang wa ki warep ka Myntdu Pynthorneiñ Farmers Welfare & Producers Organization, ha i yahkhmat u Jurbha Phawa wa u Pyntngen Kyndait kawa da dep pynman ha ka 31-07-2021.
ka seiñ Khooid Ya Ka Wah Myntdu (KYWM) da yakrehlang biang ko wa kiwa chong chnong ka dong Ksehlung Khliehtyrchi, chirup wa u SK Lato uwi na ki waheh ka chnong Jowai wa u K. Rymbai Waheh Chnong Khliehtyrchi, heiwa da thung dieñ biang sa kamwa 100 tylli ki tre dieñ ki Cherry Blossom ha ka 23 tarik uni u bnai nadooh 10:30 i step deiwa sdang nadooh na Phlong Chaad Niam ka Khliehtyrchi tymbud u sarokbah hadooh ha thaw pyndep niam ya kiwa da khlaad ha dong Ksehlung.
Ya kini ki tre dieñ da e sñiawbha da u S.K. Lato uwa da pynchlur bha ya ki khynroo wow thung dieñ yow bha yow miat ka beirymaw.
Hachwa wow thung ya kini ki tre dieñ da pynman ya ka yalang wa tbian, kawa da pynlai da u Chngain Rymbai uwi na ki khynroo ka dong Ksehlung.
Da yoh leh yei klam na u Jurbha Phawa uwi na ki waheh ka chnong Khliehtyrchi, uwa da pynsñiaw yei sñiawngooh hadooh kattæ kattæ ya u S.K. Lato uwa da yarap u e ya kini ki tre dieñ wei da kyntu kyrsu u leh ya ki para wa chong chnong Khliehtyrchi yow sumaar sukhær hadooh wa heh kini ki dieñ neibynta u pynngaad ka chnong ka dong waroh kawi.
Ha kani ka yalang da yoh ya i klam na u Khroo L Pariat, President ka Khooid Ya Ka Wah Myntdu, uwa da kyntu kyrsu ya ki khynroo khyllood ka chnong ka thaw yow chim yei kitkhlieh wa kammon kwah ki u man ka mynstep ka mynried ka yong ka jait ka kynja ka yong i, ka rukom im kawa ryum namo kawa u rkhiang i manbru longbru, khamtam ha tawiar ka wah Myntdu. Da kyntu ya ki khynroo, ki manbei ka dong Ksehlung wow sumaar yow pynbha ya kini ki dieñ wa manda heh kini ki dieñ yow man ki ka nongmuna ya ka chnong Khliehtyrchi waroh kawi wa ki chnong wa yajan wa ka, kamjooh yow nang pahooh ka um cha Pynthorneiñ wa cha ka wah Myntdu, wa kini ki deiñ u ksoh ki ya ka khyndaw, yow chngaaiñ ka chnong ka dong waroh kawi kamwa da yoo i, wa kat dang em ki dieñ ki siej u slap leh wan u, ka baam leh biang ko ha ka beirymaw, ka khyndaw leh skem ko.
Neiliang u S.K. Lato hei klam yong oo da pynsñiaw u wa neiliang yong oo daw pteiñ chooh u yeini i yarap i yong oo wow e dieñ lada yoo u wa kiwa chong chnong ka Ksehlung man ki kiwa ri wa sumaar ya kini ki dieñ deiwa daw wan pait langær u leh ya kini ki dieñ wa da thung ynne ka sngi, wei e yaroh u leh ya kiwa chong chnong kani ka thaw wa bien ki u chim ya kani ka bynta, deiwa e nongmuna u wa boon ki bru tip ki u ah u pynkhyllem donhi ya ki dieñ katwa yow thung wan ym bna de ki, katda kamtæ pynchlur chooh u yow chimkhia ya kam kini ki bynta.
U Waheh Chnong ka Khliehtyrchi da e kyntien sñiawngooh u ya u Khroo L Pariat President wa ya ka seiñ Khooid Ya Ka Wah Myntdu kamjooh ya u S.K. Lato kiwa da chim ya kani ka bynta wow pynyoh ya kini ki dieñ, deiwa ong u leh ka chnong Khliehtyrchi leh daw thooh laad chooh ko kamon u ye u thung chooh ya ki dieñ, yow man kawa pynyoosuk ya ka chnong ka thaw, yow yoh ya ka um ka la-er wa bha wa pynngad.
Ka seiñ KYKWM lyngba kani ka khubor kwah ko leh u pynsñiaw cha kiwa chong chnong tawiar ka wah Myntdu wa toh u dam noh ki u noh jhep noh khyndaw cha ki sarok wa ki rood ki kiar ka wah Myntdu, khamtam wow sñiawbha u dam u noh ya ki Plastic cha ki chariñ ki synrang, kamwa man katni ki jri ki Plastic man ki kiwa choon kiwa thmu u pyndooh yei chngaaiñ, iwa da wanrah i jynjar ya i ki bru wa kamjooh ya ka wah Myntdu kawa psa um wa ka la-ær ya i ki bru wa kiwi kiwa im wa booh wa thoo u Blai.
Kamjooh leh kamwa da yoo wa ka khyndaw wa pynkai cha ka wah Myntdu lyngba i pynheh sarok na Treiongriang hadooh Lad Muphlang daw wanrah ko yei maa ya ka wah Myntdu khamtam ka thaw pynlang um ka yung krehkaam u EE PHE Electrical Jowai Division ha Mupiah, heiwa katkam ka Test Report da batai ko wa da boon da i ktieh ha ka um cha wa palat. Ha kani ka tlang wa daw wan, ym tip kammon daw tikna u yoh um namo ym yoh um ka chnong Jowai, lada kani ka akor ki bru u noh bait katwa ngait u pteiñ bait ko.
Ka seiñ pynsñiaw ko leh wa ym pyrchah ko yei wan ki sarok ne iwon iwon iwa myntoi ki paidbah tangwa lada i kaam man i iwa daw ktah ya ki bor kiwa pynim ya i ki bru ha tawiar ka wah Myntdu, kam ya kitæ ka seiñ u yeiñ pyrchah ko.
Kyntu kyrsu i ya kiwa chong chnong wa ki Dorbar Chnong tawiar ka wah Myntdu wow sñiawbha u yakrehlang chirup wa ka seiñ, yow chimkhia u pait wa ym hoi u chah u noh næ pynkai taroi ki bru ya ki jakhlia wa mih na ka chnong ka thaw, khang yow im yow khooid ka wah Myntdu, iwa na ka donhi yoh um baam um dih i, yoh i ya ka la-ær wa pynim, ki doh um yow im lang ki, ka khyndaw u skem u neh ko yow chngaaiñ ki kynthai ki khynnah ka chnong ka thaw ha tawiar ka wah Myntdu.
