Ka Mihmyntdu Community Social Welfare Association (MCSWA) haka 10 wa 11 tarik uni u bnai da pynman ko yaka e sikai wa kyrpang neibynta ki 25 ngut ki kynthai ha Salaroh, Jowai heiyatoh wa kammon u yada ki ya idæ la jia tyngkhooh ki iwon iwon i chah thombor heiwon iwon i por.
U Aris Nongkynrih, Chief Functionary MCSWA hawa klam da ong u i daw wa pynman ya kani ka e sikai toh wa da yoo emkaam bha ya ki kynthai u tip ki haka juk wa katni wa da joor ware i chah thombor ha ki rukom waphær waphær khnang yow ye ki u yada yei rynyieñ yong ki.
Hei yaklam wa u Isaiah Kharmawphlang uwa wan napoh ka Happy Red Rooster MMA Shillong, wei uwa man leh kam uwa e sikai leh ya kini ki kynthai, da khana u wa ka thaw sikai yong ki toh ka sikai heiyatoh wa ka Martial Arts wei haki snem chadien rap pynlai yumut bha ki haka Mixed Martial Arts wei kiwa wan chah sikai leh toh yow chimbynta ha ki yakob namo ki Competition.
Tangwa hadien wa boon won ki kynthai wa wan ymtoh neibynta u lai chimbynta ha ki Competition, tangwa wow yoh sikai u yada pyn ya idæi, kamtæ da sdang ki leh ya kani ka e sikai neibynta ki kynthai.
Neiliang ki kynthai wa da yoh i chah sikai leh pynsñiaw ki yei kmen wow yoh kam kani ka laad e sikai i wym jooh johkhe ki nachwa.
