Ka Mihmyntdu Community Social Welfare Association (MCSWA), Jowai deiwa ya krehlang wei kyrchaan ka Meghalaya AIDS Control Society (MACS), da pynman ki ya ka pynsñiawthooh paidbah ha ka chnong Lad-Mukhla ha ka 15 tarik uni u bnai.
Ya ka yalang da pynlai da ka Sunita Suna, Programme Manager MCSWA, TI-FSW, hiewa da sdang ya ka yalang da ki ktien pdiang sñiawbha da u Waheh Chnong, u Ebormi Lyngdoh wei da pynbood leh yei saam kot lakdop pynsñiawthooh paidbah namo ki IEC Pamphlet cha kiwa wan chimbynta.
Ka Dr. JN Shullai kam kawi na ki bru chemphang da klam ko chaphang ka HIV/AIDS deiwa khana kammon poor uni u khñiang, i rukom yada, ki Test wa ye u leh kamjooh ki laad sumaar.
Da ong ko wa lada em kiwon kiwon kiwa yoh HIV hadien wa Test ha ka Integral Counseling and Testing Center (ICTC) lane ha Mobile ICTC kamjooh ha kiwon kiwon ki thaw sumaar yei ki wow yoh yei sumaar ha ki ART Center kawa em hapoh ka District wei kawa e sumaar dei mynkna.
Da khana ko leh ya ka Anti-Retroviral Therapy (ART) i dawai kamjooh i rukom sumaar ya kitu kiwa em ya u HIV, da e da ka National AIDS Control Organization (NACO).
Ka Dr. JN Shullai da pynkut ko deiwa ong wa katni ym pu ye wow pynchait ya kiwa yoh HIV tangwa ye won wow pyntlot yei bor u khñiang deiwa yoh sumaar smat ki lyngba ka ART.
Ka Dr. P. Shylla kawa pait ya ka Blood Bank, Jowai da klam ko chaphang i e snam wei kiyi kiwa ye wow e snam heiwa kiwon kiwon kiwa da dap 18 snem da ye ki wow e snam yow yarap pynim ya ki bru.
Na kiwa boon kiwa chimbynta da kylli ki ya iwa boon i wym sñiawthooh ki chaphang u khñiang HIV kamjooh i kjut AIDS wei da wai leh ya ka Condom Outlet hapoh ka chnong da u Waheh Chnong.
