Kam chibynta i lehkmen dap 40 snem ka Mihmyntdu Community Social Welfare Association (MCSWA) lyngba ka chnat krehkaam wa em ha Khliehriat watip kam ka MCSWA TI CC chirup i krehlang waka yung krehkaam yong u Range Forest Officer Social Forestry Khliehriat waka chnong Dkhiah East, da pynman yaka lehkmen World Environment Day ha kani ka 2 tarik ha Dkhiah East, East Jaiñtia Hill District.
Hachwa u thung dieñ da em ka yalang wa tbian wada pynlai daka Rinibeth Patlong, Program Manager MCSWA chirup i emlang u waheh chnong, u Dr. J. Nongtdu, ki Principal yong ka 14 Ri-Pnar Brighter Secondary School, Dkhiah RCLP School, ki khynnah skur wa kiwa chah khut sñiawbha.
Kiwa klam ha kani ka sngi nadooh ka Principal 14 Ripnar Brighster School, ka T. Nongtdu, wa u waheh chnong da pynsñiaw ki i sñiawngooh yaka MCSWA wada pynman ko ya kam kani ka yalang kawa e myntoi yaka chnong ka thaw hawa kammon u pynyirngam pyn yoosuk yaka chnong ka thaw lyngba i thung yaki dieñ ha soodong ka chnong khnang yow yoh yaka la-ær wa pynngad. Da kyntu kyrsu haroh yaki khynnah skur kiwa em hajan u sumaar ya kini ki dieñ wada thung ha kani ka sngi khnang yow heh yow san ki yow man ka kyrkhu yaka chnong.
Katkam wa ka phangpyrdi yong kani ka sngi kawa ong “Only One Earth” iwa mut wa em du kawi donhi ka pyrthai, da pynsariem yeini ya ka bei u pa wa yoh ki du kawi donhi kamtæ emkaam u maya ya ki, u burom ya ki, kamtæ heiyatoh waka rymaw leh emkaam u maya u burom yaka khnang u theh ko i kyrkhu ya i ki bru.
Ha kani ka sngi da thung hadooh 60 tre ki dieñ ha soodong yong ka madan bol.
