Ka seiñ krehmon sñiawbha kawa tip kam ka Mait Lynti Rural Development Society deiwa ya krehlang wa ka yung krehkaam u District Medical & Health Officer, East Jaiñtia Hills District, Khliehriat da pynman ki yaka e sikai wow pynsñiawthooh paidbah hajrong ka khlam COVID-19 hajrong ka phang “Awareness Programme On COVID-19 Crisis” kawa da pynman haka 22 tarik uni u bnai ha Community Hall yong ka chnong Bataw.
Da wan ya chimbynta ha kani ka yalang da kiwa sikai skur waphær waphær wa ki wakreh yong ki Anganwadi Centre kiwa em hapoh Bataw. Ya kani ka yalang da pynman deiwa yoh yei kyrchaan poisa na ka yung krehkaam u Deputy Commissioner ka East Jaiñtia Hills District.
Kiwa klam ha kani ka sngi toh ka Syrpai Khongstia kawa sikai ka Alpha Secondary School, ka Thiangmon Suchiang kawa man kam ka Head Teacher ka Bataw Nein Govt. L.P. School, ka Gracesilda Lahong ka wakreh ka Anganwadi Centre B, ka Baluilui Biam kawa man kam ka wakreh ASHA. Kamjooh da yoh yei klam na u Assistant Waheh Chnong Bataw u Ampli Rupsi.
Ya ka yalang da pynlai da u Bilis Pyrtuh, President ka Society wei da yoh yei pynche chaphang ka Society da u Deihok Sumer, General Secretary.
Ka kongsan kamjooh kawa toh u man kam ka bru chemphang (Resource Person) ka Dr. E. Lyngdoh yong ka Bataw PHC na ki daw wym ye u kiar, da wan mihkhmat noh da ka S. Sutnga, Supervisor Bataw PHC kawa da e yaroh ya ka Society wa ye ko u thooh ki laad ki luti u pynman kam kani ka yalang kawa e myntoi ya ki paidbah ka chnong Bataw deiwa ong wa hawa kyruiñ dieñ, nyngkong da hær-rngu ki paidbah ya u COVID-19 heiwa da sñiaw kam u chohnoh næ kam u bru u wow wan ksoh, u pynyap kam u jait thaw uwa ye u yoo dei khmat.
Da kyntu ko ya ki paidbah wow sumaar bha ki wei u lehkhooid, neibhah ki dak ki chin hi kiwa yoh ya uni u khñiang toh i ky’oh, synrum, iñdoh wa kamtæ ter ter deiwa ban joor ko ya ki paidbah chong chnong wow ya krehlang wa ki bor chnong, bor sorkar yow ye u khanglaad yei poor uni u khñiang COVID-19.
Da pynkut ya kani ka yalang da ki kyntien e khublei na u Assistant Secretary ka Society u Omega Sumer.
