Jowai: Ka Meghalaya State Commission for Women (MSCW) lyngba i yarap ka Ministry of Law & Justice, ynne ka sngi da pynman ko ya ka yalang wow esikai ya ki seiñ kynthai waphær waphær na ki le tylli ki Block ka West Jaiñtia Hills District hajrong kammon wow pynsñiawthooh kyrpang ya ki heiyatoh wa ki aiñ wa ki laad yarap wa ye ki u yoh.
Ya ka yalang da pynman ha District Library Auditorium, Mynthong, Jowai hei emlang ka Theilin Phanbuh, Chairperson Meghalaya State Women Commission (MSWO), ki bru chemphang wa ki seiñ kynthai waphær waphær ka District.
Ka Theilin Phanbuh ha i klam da ong ko wa kani ka yalang toh wow pynman ya ki kynthai kiwa chemphang wa kiwa tip kammon ki aiñ wa ka sorkar da pynkup bor ya ki wei manda tip ye ki wow yada hawa ngat ha i chah thombor, chah lehbeiñ ha yung ha sem khamtam wa yatoh wa i rynyieñ yong ki.
Chooh chooh da ong ko wa hadien wa ki seiñ kynthai da chah hikai ki, ki won wow rah wyrta wow pynsñiawthooh won cha kiwi kiwa boon wa lang neibhah wa man i iwa eh ya ka Commission wow poi cha kylleiñ ki chnong ki thaw.
Da ong ko wa ymye u len, wa i chah thombor ki kynthai man i ha kiwa boon ki bynta wei ha kini ki sngi boon ki kynthai kiwa chah chim kabu khamtam ki manbei wa chong samen neibhah wa haap pynheh pynsan ki ya ki khon yong ki.
Kamtæ da pynchlur ko ya ki manbei wa lada em iwon iwon i eh i khoo nadooh i chah thombor i chah banbeiñ ha iwon iwon i rukom wow ujor wut wut cha ka Commission.
Ha kani ka sngi da yoh leh i batai na ki bru chemphang wa kynthup ya ka Annie Sohtun, Coordinator MSCFW, ka Rebina Subba (Muktiar) wa ka I. Tariang, Member Secretary MSCFW.
Waroh kini da pynsñiaw ki hajrong ki aiñ kiwa ka sorkar da pynkup bor ko katkam ka riti synchaar ka ri heiwa da batai leh chaphang ka The Protection of Women from Domestic Violence Act 2005 wa ka Special Marriage Act 1954.
Discussion about this post