Ka Nehru Yuva Kendra Sangathan Jowai chirup waka Mukhla Nongrim Sport Club da pynman ki ya ka Block Level Neighborhood Youth Parliament ynne ka sngi ha ka chnong Mukhla Nongrim kawa da wan sakhi lang chirup da u MLA ka Jowai u Wailadmiki Shylla uwa da kyntu leh ya ki khynroo khyllood wow tia chaphrang ha ki kaam yaleh Sports.
Da yoh leh i klam na u Waheh Chnong ka Mukhla Nongrim u Buhlut Suna uwa da e mynsien ya ki khynroo khyllood wa kamjooh ya ki Sport Club, neiliang yong u General Secretary ka Mukhla Nongrim u Standbyme Sari da klam u heiyatoh waka phang Common Service Center waka Digital India. Neiliang u Sonatan Das, Sub-Regional Officer Youth Employment Exchange Officer da e u yei batai heiyatoh waka National Career Services.
U Wanteibor Khonglah uwa man kam u National Youth Volunteer ka NYKS da e u yei klam wow pynchlur u sdang ya ki Youth Club wei wow ya krehlang chirup wa ka NYK.
Ha kani ka yalang neiliang ka yung krehkaam ka NYKS da saam ko leh ya ki tiar yeleh Sport cha ki 20 tylli ki Youth Club wa em ha poh Thadlaskein, Amlarem wa Laskein Block heiwa ya kini ki tiar da saam da u Wailadmiki Shylla.
Ya ka yalang da pynlai da u President ka Mukhla Nongrim Sport Club u Ryngkatlang Sari wa u General Secretary ka Sport Club Mukhla Nongrim u Firstly Sari deiwa emlang leh ki waheh ka chnong, ki dkhot ka Club wa kamjooh ki Volunteer ka NYKS Jowai.
Neiliang ka Mukhla Nongrim Sports Club e khublei kyrpang ko ya ka yung krehkaam ka NYK deiwa ong leh wow ya krehlang chirup chilang neini chakhmat.
