Ka Dorbar Chnong Mukhla Nongrim da pynman ko yei sien nyngkong hapoh ka chnong wow kynmoo warom ya ka lyngkhooh sngi yap wa 159 snem u khlawait ka Ri-loom Jaiñtia U Kiang Nangbah da ka yalang wa pynman ha pchem ka yung dorbar ka chnong.
Ya ini da sdang nadooh 8:00 waje i step deiwa pynkhooid ya ki dong ki chnat da ki khon khynroo chynrang wa kynthai ka chnong, wei hadien ini da sdang da ka dorbar wa tbian kam i dak wow kynmoo warom ya uni u khlawait ka ri heiwa ya ka dorbar da pynlai da u Vice Chairman ka chnong u Lunar Suna wei da yoh leh ya ki kyntien tbian wa i khana chaphang i im wa i man u Kiang Nangbah da u Standbyme Sari, uwa man leh u General Secretary ka chnong wei da yoh leh yei klam na u Bormi Sari wei khaddooh da yoh i klam na u Buhlut Suna, u Waheh Chnong ka chnong Mukhla Nongrim uwa da khana yei parom u Kiang Nangbah nadooh wa dang khynnah hadooh wa heh wow mih chakhmat wow man kam uwa yahkhmat wow yaleh pyrchah wa ka sorkar pharæng hadooh wow kut i mynsien ha u tylle pasi neibynta ka ri wa ka jaitbru yong i.
Hadien ini da pynman leh ya ka yakob siat khnam pyllah kawa da wan wow chimbynta hadooh 10 ngut heiwa hawa khaddooh yei naam jop da yoh u Kor Sari katwa u Bram Suna da wan u hei wa ar.
Da yoh leh wow pynman ya ka yalehbol hapyrdi ki khynroo wa kiwa man pa.
