Kam chibynta i lehkmen dap 50 snem i yoh jylla ka Meghalaya, neiliang ka Jaintia Hills District Unit ka Meghalaya Veterinary Services Association (MVSA-JHDU) da pynman ko ya ka Livestock Mela ha District Library, Jowai, West Jaintia Hills District ynnin ka 19 tarik.
Neidaw wa em ki kyndon yada na u COVID-19 da chah wow embynta du 50 ngut ki warep na ki le tylli ki Block kitæ ka Laskein, Thadlaskein wa Amlarem. Da em leh 6 tylli ki dukan wa booh yow pynyoo rong ya ki mar wa pynmih da ki warep. Heiwa ya kani ka Mela da wai da ki ktien wai phang da u Dr. D.I. Kjam, Chairman, MVSA-JHDU uwa da pdiang sñiawbha leh ya waroh ki dkhot ka MVSA, kiwa chah khut sñiawbha wa kamjooh ya ki warep.
Ka Dr. E. Passah da khana ko wa i thong kani ka Livestock Mela toh wow pynyajan yajooh hapyrdi ki wakreh ka Veterinary wa kiwa psan mrad wa kiwa ri syiar.
U Dr. M. Tyngkan, Vice-President, MVSA won da pynchlur u ya ki warep wow wan ki chakhmat wow chimbynta ha ki e sikai khamtam kammon wow pynpunkhon ya ki mrad deiwa leh da ka Artificial Insemination iwa smat ka chnat wow e yarap wei heijooh i por ymtoh u sarom wow ri mrad neibhah yarap ko wow pyndap pynbiang yeiwa emkaam ka jylla..
Neiling ki warep da klam u Tonroi Iongwai uwa da pynsñiaw yei sñiawngooh ya ka MVSA-JHDU wa da pynman ko ya kani ka yalang deiwa ong wa i krehlang ka chnat wa ki warep lyngba kam kini ki yalang daw pynmyntoi bha ko ya ki warep.
Neiliang u kongsan ha kani ka sngi, u Dr. W.M.W. Khongwir, President, MVSA, Shillong da e khublei u ya ka MVSA-JHDU wa da pynman ko ya kani ka yalang hadien wa da jied ya ka kam ka District Unit wow pynman ya ka yalang wow lehkmen yei dap 50 snem ka jylla Meghalaya. Da pynchlur u leh ya ki warep wow pynlut por ki yow pynku yei yoh i la, i kot i dap yong ki wei wow pynemkaam ya waroh ki stat ki buit wa da yoh ki ynne ka sngi wei wow sikai lang leh ya kiwi kiwa em ha ki chnong ki thaw yong ki wei ym toh wow sarom u kylli na kiwon kiwon ki bru ka chnat nadooh ki Doctor kamjooh kiwi kiwi lada em i wym sñiawthooh ki.
Ya ki kyntien e khublei ha ka yalang pynwai da e da u Dr. F.R. Shadap, Secretary, MVSA-JHDU, iwa pynbood won sa i lait pait ya ki dukan pynyoo rong da u kongsan.
Ka bynta e sikai namo ka Technical Session da pynlai da ka Dr. (Mrs) I.D.Slong, EC Member, MVSA-JHDU. Wei da yoh ya ki sikai na Dr. S.M. Toi hajrong ka phang “Importance of Livestock & Poultry Rearing in the midst of the Covid-19 pandemic”. Wei da pynbood sa ki saam Certificate wa ki tiar sahkynmoo cha ki warep wa wan wow pynyoo rong ya ki mar.
