The National Commission for Women (NCW) deiwa ya krehlang waka Meghalaya State Women Commission ynne ka sngi da pynman ki ya ka yachem lang yow ya phyllu wow yaleh pyrchah ya ki kaam khayi bru hapoh ka thaaiñ mihsngi namo ka “Combating Human Trafficking in NER” ha North Eastern Council Auditorium, Shillong.
Ka thong yong kani ka ya phyllu toh yow chem ki laad ki luti kammon wow leh pyrchah yei chah rahbor chah khayi tooh ki bru wei wow pynsñiawthooh ya ki kynthai wa ki khynnah kynthai khamtam wow e sikai leh ya ki Anti Trafficking Unit wei wow pynkhlan ya ki bor ka aiñ kiwa embynta ha kini ki kaam.
Neiliang ka Rekha Sharma, Chairperson ka National Commission for Women da yaroh ko yei pynkupbor ya ki kynthai ka thaaiñ mihsngi heiwa da yow ki wow embynta ha waroh ki liang ka imlang sahlang.
Ka Sharma da ban joor ko yei emkaam wow thooh ya ki buit wa thymme kammon wow yada wei wow pynchitom ya kiwa khayi ya ki kynthai ka North East khamtam wa ka thaaiñ em pood ko wa kiwi ki ri kam ka Bangladesh, Nepal wa Myanmar kiwa man kam chibynta i pynlai ya kiwa boon kiwi ki mar tooh.
Heiyatoh wa i khayi ya ki bru, ka Sharma da ong ko wa ka NCW deilang wa ki State Commission ki jylla toh u leh chooh chooh ki yei bynta yong ki wow pynyoh kreh wei wow pynsñiawthooh ya ki kynthai ha ki skur wa ki College wei wow pynman leh ya ki yalang wa waroh kiwa embynta yow yaklam yei chem chitom ki.
Kiwi de kiwa klam ha kani ka sngi toh ka Phidalia Toi, Chairperson ka Meghalaya State Commission for Women wa u C.H. Kharshiing, Planning Advisor, North Eastern Council.
