Ka North East Adventist University (NEAU), Khliehtyrshi ynne ka sngi da leh burom ko yaka World Physiotherapy Day namo ka sngi wow kynmoo kyrpang ya kiwa kreh kam ki Physiotherapists wa em ha kylleiñ soodong ka pyrthai hajrong i embynta yong ki u wanrah i chait i khiah ya kiwa kjut wei wow pynyoh biang leh i rukom im wa laitlooid kamwa jooh man ki.
Ha kani ka sngi da wan sakhi lang u Montri ka sorkar jylla u Kyrmen Shylla, ka Dr. Andrea Shylla, Orthopedic Physiotherapist, District Early Intervention Centre Jowai, hei emlang ka Dr. Jemima Marak, Liaison & Development Officer NEAU, Dr. Paul Bhaggien, Vice Chancellor NEAU wa kiwi haka yalang wa pynlai da ka Phiralynn Kharkongor.
Neiliang ka NEAU chim ko leh yaka kabu u pynsñawthooh paidbah lyngba ki Presentation heiyatoh waka Osteoarthritis namo ka kjut mat, wei ka Dr. Junita Kyndait (PT) HoD Physiotherapy Department NEAU, hei klam yahkhmat yong ka ong haroh ko wa yeini i kjut boon rap yoh kiwa da heh rta.
Neitæ u Dr. Nichwa LS Nongtdu, Asst. Professor NEAU & NEACON da klam u hajrong ka phang Pathophysiology & Medical Management of O.A., u Dr. Amedwent Kyndait (PT) Assistant Professor, NEAU, hajrong ka phang Physiotherapy Management of O.A. katwa ka Dr. Eusivia Pasi (PT) Consultant Clinic Physiotherapist Ialong Civil Hospital kawa man leh ka Asst. Professor NEAU da klam ko hajrong ka phang Prevention & Advice for O.A.
U Kyrmen Shylla hei klam yong oo e yaroh u yaka Northeast Adventist wa lyngba i leh burom ko ya kani ka sngi ki paidbah leh u tip ki yei chakri wa kyrpang yong ki, neibhah kamwa man katni da em lut ki Doctor wa puræ bniah ya kawon kawon ka jait kjut.
Heijooh i por wot ya oo hi samen leh sñiaw myntoi bha u wow yoh u emlang ha kani ka sngi.
“Kam u bru wa em haka saiñ hima sima wa hap u pait yei kjut wa boonjait namo ki eh haka imlang sahlang yooluti O wa dei yakrehlang daw ye u pynjem ya chiboon i eh i khoo la heiyatoh i chait i khiah wa kiwi,” ong u Kyrmen Shylla.
Ka Dr. Andrea Shylla kam ka Physiotherapist ong ko wa dap ko dei mynsien wa kmen u kreh ya kani ka kaam neibhah wa yoh ko yaka laad u yarap yaki bru wow yoh biang ki sa chisien yei im wa kmen wa laitlooid, wot hadooh ki wym ye de u lai leh.
“Lada em ha kawon kawon ka bynta wow e i chait i khiah yaki paidbah ye u man kam ki Therapist, Cardiologist, Surgeon, Medical Specialist wa kiwi, tangwa lym em itæ i sñiawsuk yei kaam wa kreh, næ em i sñiaw yajan wa kiwa kjut, pynyoo hi wada bakla u man kitæ ki bru wow e chakri heiyatoh i chait i khiah ya u paidbah,” ong ka Dr. Andrea.
Heijooh i por sñiawkmen ko leh wa ka Physiotherapists Course toh kawa da em ha kani ka University, heiwa ki khynnah ka District wa em i angnood ya kani ka laiñ wym duk de ki u lai cha jngai, najrong wa pynduna ko i lut i sep yong ki bei ki pa.
Ha kani ka sngi da wai leh yaka Electro Therapy Lab, da saam leh yaki khusnaam cha kiwa jop haka yakob Poster Competition.
Hei janmiet kani ka sngi won da em ka Free Health Checkup neibynta kiwa chong chnong ka Khliehtyrshi kiwa da wan hadooh kamwa 21 ngut.
