Ka NESFAS ha kani ka tayaaw da pynman ko ya ka 2nd Mini School Meals Festival kawa chi sngi ha Laitsohpliah, East Khasi Hills deiwa wan sakhi ki bru wa kreh mon sñiawbha nadooh na baar ri, ki sahep sorkar wa uwi uwa thoh khubor na baar ri deiwa emlang kiwa sikai skur, ki MDM Cook deilang wa kiwa chong chonng ka Laitsohpliah.
Da wai ya kani ka tamasa da ka Kathleen Finlay, President ka Glynwood Centre for Regional Food and Farming, New York kawa da ong wa sñiawkmen ko wow embynta ha kani ka sngi neibhah ka seiñ yong ka leh toh kawa kreh yow pynkhai im biang yei rukom pynmih baam yong rim ha United States khamtam ha New York iwa da wiar jait katwa dang lai i por.
“Dang em boon ki jait baam tynre ha North East India tangwa em leh ki rukom wa thymme kiwa ye u pyndooh ya iwa da pynmyllien nadooh warim wei ngait O wa ka NESFAS daw ye ko wow yada yeini iwa rim,” da ong ka Kathleen.
Kani ka yakob man ko leh kam chibynta wow pynchlur u pynemkaam da ki baam wa chait wa khiah ha ki skur heiwa da em 6 tylli ki skur kiwa chimbynta wa kynhup ya ka Dewlieh Govt LP School, Nongtraw RCLP School, Mawmihthied Govt LP School, Khliehumstem Presbyteriam LP & UP School, Subakalai SSA LP School waka Laitsohpliah RCLP/UP School.
Kini ki skur da pynkhreh ki leh ya ki baam wa da e ki ha ki skur yong ki heiwa kiwa bichaar da jied ki ya ka Khliehumstem Presbyteriam LP & UP School kam kiwa jop.
U Mark Bittman uwa thoh chaphang ki baam uwa na America da ong u wa emkaam wow pynyoo pyrthai ya ki baam tynre wei sñiawkmen u wow yoo wa dang em kam ini. Da ong u leh wa i rep du uwi donhi u mar rep da ktah ko ya waroh i rukom pynmih baam hapoh pyrthai wei ka pyrthai hap ko wow yoh yei sikai na ki jaitbru wa dang bood yei tynre kam ha Laitsohpliah.
Discussion about this post