Ka Dorbar Chnong Loom Soo Iung, Newhill, Jowai ha ka thong wow wanrah yei khooid i pliah wei chongsuk chongsaaiñ ka chnong ka thaw, ynne da pynman ko ya ka yachemlang wa kyrpang ya ki kiwa e yungwai wa em hapoh u pood u ang ka chnong.
Ha kani ka yachemlang neiliang u Evermore Suchiang, Waheh Chnong Loom Soo Iung da e u ki kyntien yahkhmat heiyatoh wa ka thong yong kani ka yalang katwa kiwi won ki dkhot ka dorbar chnong kiwa da e i klam i batai chaphang i chongsuk chongsaaiñ wei khooid i pliah toh ka Phidelia Toi wa u Scofield War Nongbri.
U Evermore Suchiang hei klam da kyrsu kyntu u ya kiwa e yungwai waroh wow man kiwa tip u burom ya ki aiñ ki adong ka dorbar chnong wei heijooh i por leh toh u man kiwa yakrehlang wa ka dorbar chnong neibynta i miat i bha ka imlang sahlang yong waroh kiwa chong chnong.
Ka Phidelia Toi hawa klam da yaroh ko ya ka dorbar chnong kawa da chimkhia u pynman ya kani ka yalang neibynta wow chngaaiñ ka imlang sahlang yong waroh kiwa chong wasah hapoh u pood u ang ka chnong khlem da kheiñ næ wanrah i sñiaw yaphær.
Kamtae kyrsu kyntu ko ya waroh wow man kiwa tip u ya burom kylliang, u ya sñiaw para bru khlem em i sñiaw yaphær jaitbru, yaphær niam neibhah ka luti i chongsuk chongsaaiñ i suk em ko heitæ.
Hawa kut yong kani ka pynsñiawthooh, u Leborki Passah, General Secretary, Dorbar Chnong Loom Soo Iung Newhill e u ki kyntien khublei.
Discussion about this post