Ka NSS Jowai Polytechnic kam chibynta wow pynsñiawthooh kammon u em yei bahkhlieh ha ka imlang sahlang, wow man leh kam kiwa yah luti ha ki chnong ki thaw ya ki kaam wa bha haka imlang sahlang, da pynman ko ya ka ‘Swachhata Hi Seva’ deiwa pynkhooid ya ki soodong sookun kani ka thaw puræ wa ya ka Iawmusiang.
Yeini da leh ha ki ar sngi kitæ ha ka 26 wa 27 tarik uni u bnai heiwa da pynkhooid ya ki luti ki syngkieñ wa da dap sa du ki Plastic wa ki jhep nadooh na khmat Yaaw Chyiap ter-ter hadooh ka thaw pynyieñ kari ka Sieñ Raij Jowai nadooh 7:00 waje i step.
Ha kini ki ar sngi da wan wow chimbynta da waroh ki khynnah wa puræ ka Jowai Polytechnic hapoh i yahkhmat u Programme Officer, u Nesserdemy Sangma, u Co-In Charge, u Emdormi Shullai wa u Cubert Neil Kitbok Myrthong.
Kani ka Swachhata Hi Seva toh kawa da sdang wei pait da ka Ministry of Sports & Youth Affairs ka sorkar India yow pynkhooid ya ki soodong sookun ki thaw wei wow pynsñiawthooh ya kiwa chong chnong heiyatoh wa kammon u lehkhooid wei wow sumaar ya ka bei rym-aw wei da leh yeini nadooh ka 15 tarik uni u bnai wei daw pteiñ hadooh ka 22 tarik u Naichiphaw, 2023 ha waroh kawi ka ri.
Neiliang ka NSS Jowai Polytechnic da kyntu ko ya waroh kiwa chong chnong, kiwa chong yaaw wei kamjooh ya kiwa lai thied leit pet leh wow sñiawbha u ri sumaar sukhær ya ki chnong ki thaw wei kamjooh ya ki yaaw ki haat khnang wow wanrah i yoosuk wei wym toh u noh roi yei jhep i jakhlia yow lait ki u kai cha ki um ki wah wa psa umbaam umdih ya kiwa chong chnong ka Jowai.
Discussion about this post