Ka chnong Pamrapaithlu ha ka 5 tarik uni u bnai da pynman ko ya i pynsñiawthooh paidbah (Awareness program) hajrong ka phang “I ktah i dih kiad wa kiwi ki jait dih wa pynmuaid”.
Ya ka yalang da pynlai da ka Pynshlurlang Village Organisation Pamrapaithlu kawa da pynman ha pchem ka Govt. L.P. School Pamrapaithlu.
Ya ka yalang da chongknor da ka Lakshmi Rymbai kawa man leh ka Chairperson ka Village Organisation heiwa da emlang leh u waheh chnong u Leningstar Rymbai wa u Dr. F. Lamin kam u bru chemphang.
U Dr. Lamin hei klam yong oo da ong u wa i kyrni kiad wa kiwi ki jait dih pynmuaid wa boon jait da ktah ko ym du yei yong samen, wanrah ko leh yei maa ya ka yung ka sem, ka imlang sahlang wa ya ka chnong ka thaw hi waroh kawi.
Chooh chooh u Dr. Lamin da ong u wa i ku i yap ki bru ha kini ki sngi toh i daw bah nei dih kiad hadooh i hiar i yoh i kot ka manyung mansem leh.
Ha kani ka sngi u Doctor da kyntu u ya ki paidbah khamtam ya ki khon khynroo ka chnong ka thaw wow kiar na ini i kaam khnang wow man ki kiwa biang wa kiwa chemphang wow ya chimbynta ha i kaam shynchaar khadar chnong, haka imlang sahlang wei yow jop ki ya i thong.
U Leningstar Rymbai da ong u wa yow pyndooh yei kyrni na i dih pynmuaid toh deiwa ya krehlang na waroh ki liang wa kynthup nadooh ki seiñ khynroo ka chnong, ki seiñ manbei wa ki bor pulit khamtam ki bei ki pa toh u sikai wei sneiñ ya ki khon yong ki ha ki kaam wa bha nadooh wa dang khian.
